Каспийскалий хьунни пограничниктурал кулпатру ялапар хъанахъисса къатри пIякь учин дурну 20 шин шаврин хас дурсса мероприятие.
Мероприятиялий бувсса цала ихтилатраву ДР-лул БакIчи Рамазан АьбдуллатIиповлул баян бунни: ливтIусса аьралитал дакIнийну жува дуручлан аьркинссару миннан ххирану диркIсса ва миннал дуручлай бивкIсса жула Ватан, — куну.

Ва кьини та терактраву лив­тIуминнал аьпалун дацIан дур­сса стелалучIа бавтIун бия азаруннийн бивсса инсантал. Шиккун бувкIун бия ДР-лул Халкьуннал Мажлисрал депутатътал, Республикалул ХIукуматрал вакилтал, аьпалул хьусса пограничниктурал гъан-мачча, ихтиярду дуруччай органнал зузалт, Каспийскаллал хьхьирил кадетътурал колледжраву ва медучилищалуву дуклакими, шагьрулул агьали. Аьпа­лул мероприятиялий ихтилат буллай, ДР-лул БакIчи Рамазан АьбдуллатIиповлул дакIнийн дуртунни халкьуннал ялун та оьсса бала бивсса ноябрь зурул 16-сса кьини, Совет Союз тири-хъири хьуну махъ инсантурал бакIрачIан дуркIсса захIматсса чIунну.
— Билаятрал тарихравун лухIи кьинину дурхсса та кьини тачIав хъамакъаритантIиссар Каспийскаллал агьалинан ва циняв­ппагу дагъусттанлувтуран. Терактраву ливтIуми дакIний бивтун, жува хIарачат буллан аьркинссару жула паччахIлугъ цIакь дан. ХIакьинусса кьини, ссаячIав нигьа къабувсун, жула паччахIлугъралгу, халкьунналгу мюхчаншиву дуручлай къаралданий бавцIуну бур ихтиярду дуруччай органнал зузалт. Ттуршвахъул инсантал ливтIунни террористуращал талай. Жува циняв цачIун хьуну, цаннал ца бувгьуну къарши бацIарча тахсиркаршивурттайн ва террористурайн, укунсса баларду къахъанантIиссар, — увкунни Рес­публикалул БакIчинал.
Дагъусттаннал ФСБ-лул Дазул управлениялул хъунаманан кIанайсса контр-адмирал Владимир Колобовлул кIицI лавгунни ноябрь зурул 16-сса кьини Дазул управлениялул тарихраву яла пашманмур кьини душиву.
— Каспийскалий дур­сса оьхIалсса терактрал сси-къащи дунни жула билаятрал ба­къассагу, щалагу дунияллул инсантуран. Мунин барашинна дуллай бур тай гьантрай Да­гъусттаннал ва Каспийск шагьрулул каялувчитурайн, Дазул управлениялийн гьарица чулуха дукIлай диркIсса, кьурчIишиву кIидачIлачIисса телеграммардал ва чагъардал. Та чIумал щин дакIнийн багьанссия та иш оьхIалшивурттал дайдихьу душиву, укунсса рахIму-цIими бакъасса ишру ттиния тихунмай цикссагу хьунтIишиву.
Ларгунни 20 шин. Арх дуцлай дур жуятура та кьурчIисса иш хьусса чIунну. Амма циксса шинну гьарчагу, жунна тай чIунну тачIав хъамакъаритантIиссар. 1996 шинал ноябрь зурул 16-сса кьини ливтIуминнал цIарду абад дурну дуссар пIякь учаву хьусса кIанай дирхьусса гьайкалданий. Каспийскаллал агьулданул ва Дазул управлениялул зузалтран ми мудан дакIний бикIантIиссар, — увкунни Владимир Колобовлул.
Ихтилатру къуртал хьуну махъ гьайкалданучIа тIутIивгу дирхьуну, ливтIуминнал аьпалун минутIрайсса пахъ багьаву дунни.
Яла салютру дай группалул бивтунни гьаваллавун. Каспийскаллал хьхьирил кадетътурал колледжрал дуклаки оьрчIал итабавкьунни гьаваллавун кIя­ласса шарду.
Цал ттигу дакIнийн бутан, 1996 шинал ноябрь зурул 16-нний Каспийскалий пIякь учин дурссар Ккавкказуллал погран­округрал Каспийскаллал пог­ранотрядрал кулпатру ялапар хъанахъисса 9 зивулийсса къат­ри. Та терактраву ивкIуссар 68 инсан. Миннава 20 мюрщисса оьрчIру бивкIссар.