Бабаюртуллал райондалийсса КIамахъаллал жямат яхъанахъисса Сангардал школалул тарихраву чIявусса ххуй-ххуйсса учительтурал цалла цIарду кьариртссар.
ЦIанагу миннал цIарду жяматраву бусравнура дуссар. ХIакьинугу миннал тарап дургьуну, лайкьну цала пишардаха зузисса жагьилсса учительтал ва школалий чансса бакъар.
Сангардал школалул учительтурачIагу, дуклаки оьрчIачIагу ва аьмну щалва жяматравугу хъинну бусравну ва хIурматрай бур ва школалий сайки 10 шинай зузисса, оьрус мазрал ва литературалул дарсру дихьлахьисса Мусаева Зулайхат Айгуннул душ.

З. АьбдурахIманова
Лакрал райондалул аривсса Сангардал школа, кIинтнил минардайсса личIи-личIисса миллатир­ттал щархъал циняв школарду кунма, багьайссар Къизилюртуллал территориал кIулшивуртту дулаврил управлениялийн. Шикку хъана­хъисса вайксса школардал учительтал гьурттусса гьар конкурсирттавух, олимпиадарттай ва личIи-личIисса мероприятирттавух гьуртту хьу­сса Сангардал школалул учительтуралгу, дуклаки оьрчIалгу бугьайссар хьхьичIунсса кIанттурду. Вана ва ххуллухгу уттигъанну Къизилюртлив хьусса «Учитель года ЦОДОУ ЗОЖ -2017» конкурсраву цалчинмур кIанттун лайкь хьуну бур Мусаева Зулайхат Айгуновна.
Зулайхат бувну бур Гъумучиял шяраву 1984 шинал. 1999 шинал марцIсса ххювардай Буйнакскаллал педагогикалул училищагу къуртал бувну, Гъумучиял оьрчIал садикраву зун бивкIун бур. КIира шин миккугу дурну, щар хьуну бур КIамахъаллал Сангардал шяравун. 2007 шинал ДГУ-рал филологиялул факультетрайн дуклан бувххун, ва гара шинал Сангардал школалий зун бивкIун бур. Жаваблувсса, цийва бивхьусса буржру тIайлану би­ттур байсса Зулайхат школалул каялувшиндарал тарбиялулмур даврил завучнугу бивтун бур. Ва давугу ванил дуллай бур лайкьну ва цинявн­нан эбратну.
Хъунмасса ва дакIнийхтунусса барчаллагьрай бур Зулайхат цинма тIайласса оьрмулул ххуллу тIивтIусса, цила ва цила мюрщи­сса уссу-ссил цIаний хъунмасса захIмат бивхьусса цила нину Аьлие­ва Шурайн ва чIа тIийгу бур мунин цIуллушиву ва лахъисса оьр­му. Ниттихъал бувмур кIулсса, дакIнийхтуну лахъан къашайсса барчаллагь тIисса арс-душру ля­хъавугу хъунмасса талихIри. Вагу Зулайхатлул ниттил ца ххаришиву дикIувча.
Вания гихунмайгу хъуни-хъунисса хьхьичIуннайшивурттан лайкь хьуннав тIий, Сангардал школалул учительтуралгу, дуклаки оьрчIалгу цIания Зулайхат барча буллай, чIа учин ччай бур давриву тIайлабацIу ва бивхьусса захIмат дузрайн буккаву.