ЮНЕСКО-лул кьамул бувсса хIукмулийн бувну, февраль зурул 21-мур кьини ккаккан дурну дур дунияллул халкьуннал дянивсса Ниттил мазрал кьинину. Махъ бакъа, му ххуйсса нижат дур. Му Кьинилул агьамшиву, жул пикрилий, хъиннура хъуннану ва тIалавшин ххину дикIан багьлай бухьунссар жулва Дагъусттаннай – чIявусса миллатругу, мазругу бусса кIанттай, ва ми мазру буруччаврил ва ябаврил масъалагу хIакьину ца яла хьхьичIунмурну, къювумурну хъанай буну тIий.
Му иширацIун дархIуну, дукIуя шиннай Хасав шагьрулий сукку дурну дур хъинну ххуйсса аьдат – арулва кIанттай, цалва-цалва миллатрал агьлугу бавтIун, хьунадакьаван арулва мазрайсса арулла байран. Мунил сиптачинугу хьуну ур шагьрулул бакIчи Сагид-Паша Оьмаханов.
Лакку мазрацIун дархIумур ккурандалул сакиншинначиталну хьуну бия Хасав шагьрулул собраниялул депутат Кьурбанов АхIмад, коммунал хозяйствалул муниципал управлениялул каялувчи Мяндиев МахIаммад, шагьрулул администрациялул транспортрал управлениялул хъунама МахIаммадов Исрапил ва мукунма Хасав шагьрулийсса лак­рал цайми-цаймигу биялчутал.
Му бусравсса байрандалул мажлисрайн бавтIун бия Хасаврайссагу, ЦIуссалакрал райондалийсса лакрал агьали, лакку мазрал дарс дишайсса педагогтал ва дуклаки оьрчIру, личIи-личIисса кIанттурдаясса хъамал. Миннавух бия «Илчи» кказитрал хъунмур редактор Качар ХIусайнаева, мунил хъиривчу ХIасан КIурухов, «ЦIубарз» журналданул редактор Руслан Башаев, Лакрал театрданул директор МахIаммад ХIусайнов, режиссер, Дагъусттаннал халкьуннал артист Аслан МахIаммадов, «Аьрщи ва агьлу» телеканал нани дай душ Марианна МахIаммадова, Ккурккуллал школалул директор Даниял Магьдиев ва м.ц.
Мажлисрай лакку мазрал байран лахъа-хъун дуллалисса махъру, ялув кIицI бувсса хъамаллурал бакъассагу, ялагу лавхъуна: шагьрулул администрациялул чулухасса вакилтал Арсланов Арсланнул ва НурмахIаммадов НурмахIаммадлул, ЦIуссалак­рал райондалул хъунаманал хъиривчу Буттаев Аьвдурашидлул, ЦIуссалакрал райондалул прокурор Сулайманов Юсуплул, ЦIуссалакрал райондалул пенсион фондрал хъунама Исмяилов ТIалхIатлул, ЦIуссалакрал азарханалул хъунмур хIакин МахIаммадова Нажабатлул, Да­гъусттаннал паччахIлугърал университетрал проректор Мусаев Мирзал, Чапаевкаллал шяраваллил администрациялул бакIчи .Аьбдуллаев МахIаммад-Пашанал ва м.ц.
Музыкалул ва балайрдал чулуха байрандалул сий бюхттул дуллалиминнавух бия: Жамал Абакаров, Гьажар Рамазанова, Пируза Рамазанова, АхIмад Расуловлул каялувшиву дуллали­сса къавтIаврил ансамбль ва м.ц.
Жул корр.