Дагъусттаннал паччахIлугърал технический университетраву ччя- ччяни дувай жагьилтуран рувхIанийсса тарбия ххишала шаву мурадрайсса мероприятияртту. Мукунсса даву хIисаврайсса мероприятие хьунни «Мы – потомки великих предков» тIисса цIанилу, экономикалул пишардансса чил билаятирттал мазурдил кафедралул сипталийну. Студентътуращал хьунаавкьунни Дагъусттаннал Жяматийсса палаталул председатель ХIамзатов ХIамзат.
ПатIимат Рамазанова
КьатIаллил билаятирттал кафедралий каялувшиву дуллалисса профессор, шаэр, прозаик ва публицист Жанна Абуевал увкунни : «Жува хIакьину гъалгъа тIунтIиссару Дагъусттаннахсса жулла ччаврия, Дагъусттаннал тарих бюхттул бувсса ппухълунная, тарихрал яргсса лахIзардая, кулпатирттал аьдатирттая. Цумурцагу кулпатрал, тухумрал тарих цIакьну бавхIуну буссар илданул ва билаятрал тарихрацIун. Жулва тухумрал тарих, гьанурду ва мархри лахьхьаврийну жува лахьлахьиссару билаятрал тарих. Жунма дакIний бикIан аьркинссар жува лавгмунил ва бучIантIимунил ламурду цIакь буллалисса, лавгмур ва бучIантIимур бахIлахIисса бурхIулттив хъанахъишиву. Жува ппухълуннал тарихрая пахрулий бусса кунма, жула ялун нанисса никгу жуятува пахрурдай бикIаншиврул, жунма аьркинни, ппухълуннал цIарду кьюкьин къадувансса куццуй, узданну ва лайкьну къуццу тIун». Шамилчинмур курсрал студентка ПатIимат Аьлиевал Расул ХIамзатовлул «Ттул Дагъусттан» шеъри бюхханну буккайхту, махъ буллуна ХIамзат МахIаммадовичлухьхьун. Ванал бувсуна цува гъирарай увкIшиву жагьилтуращал хьунаакьин, цува дакI дарцIуну ушиву жагьилтал ватандалух ччаву цIакьсса патриотътал бушиврий, 1999 шинал кунма, иш багьарча, ми ца хьуну дурк кьини чувшиврий лахъан гьаз хьунтIишиврий. Бувсуна дагъусттаннал агьали кувннащал кув мудангу дусну бивкIшиву, хъамал бакъасса къаттавагу къабивкIшиву, нитти-буттахъал хъамал ирсирай оьрчIайнгу тапшур бувайсса бивкIшиву. ХIамзат МахIаммадовичлул бувсуна дагъусттаннал мазру, культура ва ххаллилсса аьдатру ядаву мурадрай Жяматийсса палата цуку-цукунсса давурттив дуллай буссаривгу.
Жанна Надировнал бувсуна студентътурайх дарчIуну диркIшиву генеалогиялул таблица хIисаврайсса анкетарду, цуманан цала цими никирал цIарду кIулну дурив мяйжан буллалисса, студентътал, ттатта-бавахъайн оьвтIий, хъинну хъирив багьну бивкIшиву цала тухумрал тарих лахьхьин. КIицI лавгуна ХIамзат МахIаммадовичлул дарсгу студентътуран хъинну дакIний личIантIишиву.
Хъамаличунахь барчаллагь тIисса ихтилатру бувна экономикалул теориялул кафедралул хъунмур Ш. Исмяиловал ва финансирдал ва аудитрал факультетрал декан И. Устаевлул.
