Ноябрь зурул 2-мур кьини кIицI лагай журналистътурайн оьхIалну дуллалисса преступлениярттащал талатисса кьинину. Ва кьини дагъусттаннал машгьурсса журналист, публицист ва политолог ХIажи Абашиловлул цIа дирзунни МахIачкъалалив, Республикалул диагностикалул центрданул райондалийсса кIичIираваллин.

ПатIимат Рамазанова
2008 шинал март зурул 21-нний оьрмулуцIа увсса ХIажи Абашилов яргсса журналист ва даву куртIну кIулсса редактор («Молодежь Дагестана» кказит) хIисаврай акъагу, Дагъусттаннал агьалинан дакIний уссар кьянкьасса ва сивсусса граждан позиция бусса Халкьуннал Мажлисрал депутат хIисаврайгу. Ва зий уссия Дагъусттаннал печатьрал ва информациялул министрнал хъиривманугу, «Дагестан» ГТРК-лул председательнугу. Гьаманки «Дагестан» ГТРК-лул хъунаманал къуллугърайсса ппурттувуя ва кIакIаштурал луркIан дурну оьрмулуцIа увссагу.
2015 шинал июль зуруй Да­гъусттаннал БакIчи Рамазан Аьб­дуллатIиповлул шагьрулул администрациялухь маслихIат був­ссия, дагъусттаннал цIанихсса журналистнал цIа абад дуваву мурадрай, цания ца кIичIираваллин ванал цIа дизан.
ЦIа дизаврин хас дурсса митинграй чIявусса агьлу бия, гужсса гъарал ларчIсса-ларчIуннасса кьини диркIхьурчагу. Митинграл дайдихьу дуллалисса ихтилат буллай, МахIачкъалаллал администрациялул хъунаманал хъиривчу Запир Алхасовлул дакIнийн бувтуна та ппурттуву Аьрасатнал Президентну зий ивкIсса Дмитрий Медведевлул указрайн бувну, 2009 шинал февраль зуруй ХIажи Абашиловлун Чувшиврул Орден дуллушиву (аьпалухьхьун лавгун мукьах). Вице- мэрнал бувсуна цувагу ХIажи Абашиловлущал хIала-гьурттушиву дуну ивкIшиву, дагъусттаннал журналистика сантирай ва лябукку буну хьхьичIуннай шавриву ХIажи АхIмадовичлул хъунмасса бутIа бивхьушиву. Журналистнал цIа ду­сса мемориал-улттуя пардав дуркьуна цаппара шиннардий «Молодежь Дагестана» кказитрал хъунама редакторну зий ивкIсса Шамил Абашиловлул ва Дагъусттаннал Журналистътурал союзрал председатель, ХIажи АхIмадовичлул шяравучу ва хьхьичIунсса дус Аьли Камаловлул. Аьли АхIмадовичлул бувсуна интту 2008 шинал Абашилов бивтун увтми уттигу лякъин бувашиву, цимилагу Москавлив властирдал заллухъруннайн ва ихтиярду дуруччай органнайн бувкшиву му преступ­ление ашкара дуваву тIалав буллай, амма хIакьинусса кьинигу тахсиркартал бугьан бувашиву. ХIажи Абашиловлул оьрмулул ххуллун ва даврин лахъсса кьимат бишлаши­сса ихтилатру бувна Дагъусттаннал информациялул ва печатьрал министрнал хъиривчу МахIаммадбаг АхIмадовлул, «Дагестан» ГТРК- лул экс-директор Сулайман Уладиевлул ва цайминнал. Ласнал аьпа абад бувансса хIарачат бувцириннахь барчаллагь тIий, Абашиловлул кулпат Ххадижатлул увкуна: «На хъинну ххарира гьамин ва кIичIираваллин ХIажи Абашиловлул цIа дизаврий, шикку буссия ванал буттал къат­ри, шиккур ва хъуна хьусса. Ванал кулпат хIисаврай учин, на ттула ласная мудангу пахрулий бу­ссара, ттул оьрчIругу пахрулий бу­ссар укунсса буттая. Ва ия нигь цирив къакIулсса, учаймур иттату ­иттав учайсса патриот, ас-ламус, яхI-къирият хьхьичIунсса инсан». Ххадижат Абашиловал чIурчIав дунни цуппа ва иширах 8 шинай ялугьлай бивкIшиврий. Вайкссара шиннардий ппу оьрмулуцIа увми, лявкъуну, танмихIрайн кIункIу буваврих цува ялугьлай ивкIшиву бувсунни арснал Шамиллулгу: «Ихтиярду дуруччай структурардаву яла лахъми къуллугъирттай зузиминнал махъ буллуна ва преступлениялул хъирив лаян, амма я бутта оьрмулуцIа увми, ягу цайми гьунар бусса журналистътал оьрмурдацIа бувми бувассар ттигу бугьан».