Уттигъанну ДР-лул Туризмалул ва халкьуннал художествалул промыслирдал министерствалул оьвкуну, Сочилий Красная поляналийсса «Моя Россия» культуралул ва этнографиялул центрданийн форумравух гьуртту хьун лавгссия жула гьунар бусса балайчи ва художница, ДР-лул искусствалул лайкь хьусса усттар Жанна Кьурбанова. Дюхлулсса ссутнивун ва дяркъусса кIинтнивун бухханнин зана хьуна Жанна гъилисса асардащал, тиччава, Сочилия, Абхазнавунгу бивну, тиккугу жула лакрачIа хъамалу хьуну.

Бадрижамал Аьлиева
Сочилийн Красная Поляналий «Моя Россия» центрданийсса форумравух гьуртту хьун Дагъусттанная лавгссар 3 инсан: Жанна Кьурбанова, мунищал УнцIукIуллал ва Кубачиял шяравасса ца-ца усттаргу. Ва форумравух Аьрасатнал гьарцагу региондалиясса вакилтал гьуртту хьуссар. Ми бакъассагу, форумрай хьуну бур Сочи шагьрулий тачIаввагу чан бакъасса туристътал, тамаша бувну бур чIяву миллатру бусса Аьрасатнал халкьуннал усттартурал карунних дуллалисса давурттай, миннал культуралий. Ва центрданин ивма ца чIивисса Аьрасатнавух увксса куна шайсса ур, нахIакьдан бакъархха ванийн «Россия в миниатюре» учайсса. Жанна Кьурбанова форумравух гьуртту хьуну бур цила каруннил дурсса эмаратсса давурттал выставкалущал ва концертрал программалущал, миккува мастер-классгу бувну бур. Цанма кIулвагу бакъасса мазрай тIутIисса Жаннал балайрдах выставкалул гьурттучитурал ва туристътурал хъунмасса гъирарай вичIидирхьуну дур, ялагу-ялагу уча тIий. Ванил усттарсса каруннил дурсса давурттахгу муниярвагу хъунмасса гъирарай буруглай бивкIун бур, форумрал сакиншинначитуран бикIу, туристътуран бикIу ва журалул давуртту цалчин ккарккун дур. Форумрай щаллу бувсса Ккавкказуллал мурцIу хьуну бур хъинну ябацIансса, жула халкьуннал багьу-бизу, аьдат-эбадатру мяълумну чIалачIи дуллалисса.
«Моя Россия» этнографиялул центр цуппа бувну бур Аьрасатнал циняв регионнал архитектуралул хасшиннарду хIисавравун ларсун. Мукун, Центр сакин хьуну бур 11 тематикалул павильондалия: Ккав­кказ, Суздаль, Москав, Краснодардал край, Санкт-Петербург, Сибирь ва Аьрасатнал цаймигу регионну. Шикку Сибир, масалдаран, бусса бур Ккавкказуллал чIаххуврайва. Паркрал аьрщарай бувну бусса бур ттучанну, цавугу ласун бюхъайсса личIи-личIисса сувенирду, бахшишру, халкьуннал усттартурал карунних дурсса.
Паркрал дязаннив бусса бур личIи-личIисса культуралул шадлугъру, батIавуртту дуллансса сахIна. Шикку чIявуну шайссагу бур Аьрасатнал личIи-личIисса регионнал форумру. Парк цуппа бувну бур 2014 шинал.
Лавай кIицI лавгсса сахIна щаллу бувну бусса бур цала чIунийну тIутIисса балайрдал концертран куну, микку жула Жаннал ккаккан дурну дур хъун дакъасса концерт. ЧIарах нанисса туристал бацIлай, суратру ришлай, хIазирай вичIи дирхьуну дур лакку балайрдах. Ми­ккува «Моя Россия» центрданул администрациялун пикри хьуну бур ялун нанисса чIумуву шикку дуван «Дагъусттаннал культуралул нюжмар», Республикалул каялувшиндарайн багьайсса чагъардугу тIайла бувккун. Жаннахьгу тавакъю бувну бур выставкалущал ва концерт­рал программалущал ва иширавух гьуртту хьун хIадур хьу куну.
ЦIанасса чIумал инсан ивсса, усса кIану соцсетирдайхчIин най бунува кIул шай. Мукун, Жаннал «Фейсбукраву» дирхьусса суратирттайну му Сочилий бусса кIул хьуну, Абхазнавусса жула Земфира Къаллаева хъамалу оьвтIун бивкIун бур цачIанма: «Шиккува, чIаравва буруча, нану, дазуй хьунабакьиннуча», — тIий. Мукун, аьрххи цава, ххуллу кIива хьуну, Жанна Абхазнавунгу бивну бур. Къаллаевхъал чIаравва бивкIун бур Москавлив­сса «Дагъусттан» центрданул каялувчи Арсен ХIусайновлулми къатригу. Мукун жула ххаллилсса лакрачIа ЛухIи хьхьирил зуманив ххаллилну хъамалу хьуну бур. Ххишала бакъа хIурматрай, дакI тIиртIуну кьамул бувну бур Жанна Земфирал. Миккугу Жаннал чIири-хъунсса концерт ккаккан дурну дур, ЛухIи хьхьиривун бувчIун чIарах пляжрая нани­сса туристъталгу балайлул чIунил аглан буллай, бацIлай, ихтияргу ларсун, чапарданул ялтту буруглай, вичIидихьлай, телефоннайн ласлай бивкIун бур. Шикку хьуну дур лак­рал халкьуннал балайрдал чIири-хъунсса вечер.