1961 шинал Дагъусттаннал университетрал чил билаятирттал мазурдил факультетгу къуртал бувну, ва бувкIун бур зун буттал шяравун. Тай шиннардий ва хъинну сий ду­сса, чIявусса душваврал хиял бу­сса факультет бивкIун бур.

Чил билаятирттал мазурдихсса гъира Сиясат Такьижуттиновнан буттайхчIин буллуну бухьунссия. Цила чIумал ванил буттал къуртал бувну бур Москавлив Машрикьуллал мазурдил институт. Ванан ххуйну кIулну бивкIун бур парснал, туркнал ва аьрабнал мазру. ЧIярусса шиннардий зий ивкIун ур НКВД-лул (ОГПУ) органнаву, 30-ку шиннардий билаятрайх ппив хьусса репрессиярттал мугьалттухьхьун иривну, дуснакь увну ивкIун ур, амма тахсир бакъашиву тасттикь шайхту, ца шинава итаавкьуну ур. Дуснакьрай дурсса ца шиналгу ва аьйплу увну ур. 1943 шинал Такьижуттин хушрай дяъвилийн лавгун ур. Мушакъатшиву сававну дяъвилийн къауцлай унугу, повестка дуркIсса чIивима уссийхлу лавгун ивкIун ур. Мура шинал Новороссийск шагьрулучIа нанисса талатавурттаву ивкIуну ур. Лас ялув акъасса кулпатир­ттан ккарксса захIматшивуртту вайннангу ккарккун дур. Амма захIматшивурттах къабурувгун, ниттил Бадуржагьаннул оьрчIру дуккин бан, вайннал ларайсса кIулшивуртту ласун бан хIарачат бувну бур.
Сиясат Такьижуттиновнан, цинмагу ниттин кунма, ччя­ни ласгу ивкIуну, шанма-шанма мюрщисса оьрчI цинмалу ччаннай бацIан буллан кьи­с­мат хьуну бур. Школалийгу зий, ичIаллилссагу бувну, лас ялув акъанува, шамагу арснан ххуйсса тарбиягу дулун бювхъунни Сиясат Такьижуттиновнаща. Хъинну бавцIуну бикIайва ва оьрчIал дуккаврил ялув. Ванил оьрчIру школалий ххювардай дуклай бикIайва. 2012 шинал, зий 50 шин хьуну махъ, Сиясат Такьижуттиновна школалия лавгунни. ЧIярусса никирттал дуклаки оьрчIан дакIний бикIай ва ца яла цIу буну, чIюлуну лаххаймур учительницану. Ванил ичIалугу мудан, къушлий оьрчIру бакъа бакъанува, марцIну, пар-пар тIий дикIайва. Лазиларкьусса хIаятраву тачIав тIутIив чан къашайва. ХIакьинугу Сиясат Такьижуттиновнан 80 шин хьуссар щилчIав къаучинссар. Цила зумувну, цIу буну, жагьилми кунма, чIумуха лавхьхьуну, сийлувумур ларххун бикIай. Бюхъу-хъит чан хьуну бунугу, хIаятгу тIутIавун дахьларгнура дикIай.
ХIакьинусса ванил щалла ххаришиву дур тIайласса тарбиягу дуллуну, цала-цала оьр­мулул ххуллийн бичин бювхъу­сса, тIайла бавцIусса арсурваврая, миннал оьрчIая. Вайнная буниялагу ниттил пахрулунсса оьрчIру хьунни. Сиясат Такьижуттиновнал хъунама арс Эльдар ттущал ца классраву дуклай икIайссия. Хъярч-махсартту бу­сса, хIал бавкьусса, мукъуй цIу бусса уссар. 1981 шинал школагу мусил медальданий къуртал бувну, увхссар Дагъусттаннал медициналул институтрал стоматологиялул факультетрайн. Му къуртал байхту, 1995 шиная шихунай ккарччал хIакинну зий ур Нальчикрай. 2014 шинал зоочнайну къуртал бунни Дагъус­ттаннал технический университетрал инженерно-экономический факультетгу. Ванал душ Сабинагу, 2015 шинал мусил медальданий Нальчикрал №29 школагу къуртал бувну, бувххунни Ставрополлал медициналул институтравун. Институтраву ххуйну дуклай тIий гьашину Лакрал райондалул администрациялул чулуха ванин дуллунни «За отличную учебу и любовь к малой Родине» ХIурматрал грамотагу, арцуйнусса бахшишгу.
КIилчинма арснал ЯхIиял Буйнакскаллал шяраваллил хозяйствалул техникумгу був­ккуну, мунияр махъ, заочнайну къуртал бувну бур Дагъусттаннал педуниверситетрал физкультуралул факультет.
1995 шиная хIакьинусса кьининийн зий ур Дагъусттаннал МЧС-рал агьаммур управлениялий цалчинмур классрал хха­ссал бувуну. ЯхIиял ва даврий зий лайкь дурсса наградарттугу дур: «За заслуги» медаль (2002 ш.), «За участие в ликвидации стихийных бедствий» кIира медаль (2000, 2006 шинну).
Вайннал чIивима уссу Тимурдулгу школа къуртал бунни мусил медальданий. Мура шинал увххунни Дагъусттаннал университетрал экономикалул факультетрайн. ЦIана ва зий ур Да­гъусттаннал технический университетраву (ДГТУ) ва Дагъус­ттаннал университетраву (ДГУ). КIивагу кIанай менеджментрал кафедралул хъунама преподавательну. Тимур ур лавайсса даражалул пишакар. Ва экономикалул элмурдал кандидатри. Дунияллул халкьуннал дянивсса экономикалул масъаларттал 10-мур Олимпиадалий гьуртту хьуну, «Бизнес-процессы организаций» номинациялуву ванал бувгьунни цалчинсса кIану.
Ниттил талихI оьрчIал цIаний бивхьусса захIмат дузрайн бу­ккавривур, тIайла бавцIусса оьрчIавур, тIун бикIай. Сиясат Такьижуттиновна талихI бусса ниттин ккалли бан бучIиссар. Ниттил дакI пашман дансса тIул къадунни ванил цаягу арснал. Цала даву кIулсса ххуйсса пишакартал хIисаврай цивппа зузисса кIанттурдай хIурматрай бур.
ОьрчIал тIайлабацIурдал ххари буллай бур Сиясат Такьижуттиновнагу.
Шамагу арс, арснал хъами, арснал оьрчIру барча буллай бур цала нину, ласнал нину, буттал бава оьрмулул юбилейращал ва пишалул байрандалущал. ДакIнийхтуну барчаллагь тIий бур ниттихь цала цIаний бивхьусса захIматрахлу.

Андриана Аьбдуллаева