Гьарца шинал октябрьданул 5-нний кIицI лагай Учительнал кьини. ХьхьичIва байраннащал, Кьинирдащал барча буллай, кунначIан куннал открыткарду, чагъарду чичлай бивкIхьурча, цIана дакъасса соцсетьру дакъар, «Одноклассники», «Фейсбук», «Вотсап», «Инстаграм» ва цайми-цаймигу. Учительнал кьини барча дуллай, «Вотсаправусса» «однокурсниктурал» группалуву (циняв къазурчагу, бур жущал дуклай бивкIминнаву му захIматсса пишарай зузиссагу) кунначIан кув открыткарду, назмурдайсса барча бавуртту гьан дуллай буру. Ца однокурсницал гьан бувсса ва хавар таржума буван ччан бивкIунни. Ва чивчума часса цу ивкIссарив къакIулли, амма бувчIлай бур Аьрасатнавасса учитель ушиву.

Цал на Японнавусса ттула уртакьнахь Ямамотахь цIувххуссия:
— ЗучIа, Японнаву, Учительнал кьини та кIицI лагайссар, зу му цукун хьунадакьару?
Ттул суалданий махIаттал­гу хьуну, Ямамотал жаваб дуллунни:
— ЖучIа учительтурал цукунчIавсса байран дакъа­ссар…
Мунал жавабрайн вих хьун­ссарив, къахьунссарив къакIулну ливчIунна на. Пикри буллан ивкIра, ваксса экономика, элму, техника хьхьичIуннайсса билаятрай учительначIансса, мунал захIматрачIансса хIурмат циван бакъассар тIий.
Ца кьини даврия махъ Ямамотал ттуйн хъамалу оьвкунни. Му школалия архну ялапар хъанай уну, жу метролуву най буру. Му дия «час пик» дусса чIун, вагоннугу бувцIуну бия. Гужрай авцIуну ура ккуччу-пIякьа тIий бувцIусса вагондалуву. Цакуну ттул лувату ивзунни ца къужа, ттун кIану буван. На гьанавиххи хьунна ттула лувату оьрмулул угьарасса адамина ивзун тIий, щякъаикIлай хIарачатгу бував, амма му паракьат къавхьунни на цала кIанай щякъаивтун. Метролува увккун махъ на цIухлай ура Ямамотахь хъуначувнал дур­сса даврия. Пишгу куну, мунал кIисса тIивтIунни ттул хъазамравун ларчIсса учительнал лишандалийн, бувчIин бунни ттул статусрал хIурматрал лавай ивзшиву му, цала оьрмулул шиннах къаурувгун.
ЯмамотачIан хъамалу цал­чина-цалчин най ухьувкун, дачIрасса каруннищал ачаву къалайкь-я ттун, бахшиш ласун аьркинну дия. Ттул пик­рирду бувчIусса мунал бувсунни цахъи гихунмай учительтурансса ттучан бушиву, миву учительтурансса льготардай­сса багьри бушиву. Миккугу на махIаттал хьуну, цIуххав:
— Льготарду анжагъ учительтураннив дусса?
— Японнаву учитель – му яла хIурмат лаваймур пишари, учитель – му яла хIурмат бума, яла бусравма инсанни. Японнал ишбажаранчитал хъинну ххари шайссар, цалва ттучаннавун учительтал бувххукун, муния пахрулий бикIайссар…
Япониянаву уссаксса хIаллай цимилгу барану хьунна японцынал учительнал чулухунмай­сса хIурматрал хъунмашиврул. Метролуву учительтуран цанмасса кIанттурду бия, миннан тIивтIуну бия цанмалу­сса ттучанну, транспортрал ци жура бухьурчагу, билетир­ттал хъирив ми ярглий бацIайсса бакъая. Ссан аьркинссар учительтуран личIисса байран, гьарца кьини миннан байранну дуни?!
Ва хавар бувккуну махъ ттул однокурсницахъул бавчунни цалла комментарияртту чичлай.
— Японнавун гьантIиссарав къакIулли ЯмамотачIан?!
— Циван гьанна Японнавун, жучIавагу буссархха учительтурансса ттучан…
— Буниялагу? Цумурдигъар му, чув буссар?
— «Эконом», Ахъушинскийл цIанийсса кIичIираву…
— Ссан бакъару жува…
Къащигу, хъяхъавугу…
Ахирданийгу учин, гьаксса ччива жучIавагу, Японнаву кунмасса бакъахьурчагу, мунил бачIикссавагу хIурматгу, изатгу буну учительтурах…
Барча зул байран, учительтал.
Бадрижамал Аьлиева