Цала язисса арс, ягу душ ахиратравун лавгукун, ганал (ганил) цIа абад даврил даву, агьлу гьанавиххи хьунурив, ягу ва багьана, та савав хъанайрив, дайдишин чIал хъанан дикIай. Мукун хъанан бивкIуна 1975 шинал январьданул 30-нний лакрал балайлул Эверест, миллатрал магьирлугърал мусил тажиравусса абадул якьут, Шахьуйннал Мариян кьадарсса ккуллалул бувтния мукьахгу.

Тамансса шинну ларгуна, миллатрал рувхIанийсса оьрмулул лишан цув бунагу, ганил цIагу, гьунаргу ялун нанисса никиран хъамакъаритансса вари чинсса зат къадуллай. Дуллай дайдирхьумургу, ахчинсса ув­ккун, дуван къахъанай личIайва. Къагьарив патриотътурал сипталий 1996 шинал (аьпа бивул юбилей!) Гъумуксса магьирлугърал школалун Марияннул цIа дизаву цIакь дан къабитлай, ккаккан бувцири 4-5 шинал му­тталий. Му тагьар мукун дитан къабучIишиву жун, шама-мукьа патриотнан, Марияннул цIагу, пагьму-гьунаргу дакIурдиву бивхьунмасса Хан Башировлун, «Илчи» Рамазаннун (аьпа баннав цал), ттун ва архIал бивзсса ца-кIия студентнан, бувчIуна 2000 шинал январьданул 30-нний – миллатрал календарьданул лухIи кьини, жува бакъа аьпа бивул гьаттай тIутIал кацI бишин цама къаувкIукун. ХьхьичIва бикIайссия хIатталлу дурцIусса. Танийя на «Илчилул» чIапIай оьттул руцлайни куннасса дакIнивату «Багъишла бити жу, Мариян» тIисса макьала-оьвчаву рирщусса. «Зунттул бюхттулшиву архнияр ххал шайсса, ялун нанисса никиран вил бюхттулшивугу чIумул манзилданияту хъиннура мяълунну чIалантIиссар!» — тIий усси­яв на, аьпа бивул рухIгу, ттула дакIгу паракьат дуллай. Мукун хьугу-хьунни, хъанайгу бур. Иншаллагь! КIа оьвчавриву гьаз дурсса, Марияннул цIа абад дуллалисса даву элмийсса ва пландалийн чул бивщусса даражалий дачин даншиврул личIи бувссия сакиншиндарал комитет: Баширов Хан – председатель; Рамазанов Рамазан ва на – ганал заместительтал; ХIусайнаева Качар, Илиясова Мариян, Султанова Гулизар, Штанчаева Асли, Къиштилиева Мериджан, аьркин хьурча, цаймигу. Комитет­рал кьамул дурссия хIакьинусса кьинигу, перспективалийгу дуллансса даврил план. АцIанна цаппара биттур бувми пунктирдай:
— КIа ялув кIицI бувсса, ялун нанисса никиран художественно-эстетически тарбия дуллалисса магьирлугърал школалун Марияннул цIа дизаву.
— Марияннул юбилейрду (2001, 2016 шиннардий) лайкьсса даражалий тIайла дуккаву.
— Мариян ялапар хъанай бивкIсса къатрай (проспект И. Шамиля, 67) Марияннул цIа абад дуллалисса мемориалданул ула лахъаву (2002 шинал, январьданул 19-нний).
— Марияннул аьпалун хас бувсса лакрал балайрдал хъунмасса мажлис баву (2001 шин, сентябрь) ва цаймигу.
Амма ттуйнма хъунмасса бунагь ласунссия тIиссара, вай иширттаву ляличIину хъунна­сса давугу, дакIцIуцIавугу, аьпа бан, «Илчи» Рамазаннул дуршиврий чIурчIав къадарча. Мунал сакин бувну итабавкьусса «Бюхттулний бяливчIсса балай» тIисса лу на чивияв Рамазаннул инсаннал, журналистнал, патриотнал виричушивур, чумартшивур, куну.
Уттигъанну, августрал 13-нний тIурча, Шахьуйннал шяраву тIиртIунни бюхттулсса балайчинал аьпа абад буллалисса ула. Ва хъуннасса, ччянива агьали ялугьлай бивкIсса уттарашиндараяту ванил бусравсса шяравудушнил, «Илчилул» корреспондент Бадрижамал Аьлиевал кказитрал 34-мур номерданий рирщусса гьарта-гьарзасса репортажраву бувсунни. КIа дия мяйжаннугусса магьирлугърал, патриотизмалул, буттал улклухсса мякьшиврул байран. КIиккува шяраваллил агьулданул гьаз бунни ялунсса шиннардий Шахьував Марияннул балайрдал хъуннасса конкурс, цайми-цайми давурттугу даврил масъала.
Миллатрал бивкIу бакъасса булбулданул аьпа абад буллалисса давриву чансса дакъар диялдакъашивурттугу, дурагу къадурссагу. Миннул хIакъираву тамансса гъалгъа-маслихIатру кIа кьини Шахьувавгу хьунни. Миннуясса гъалгъардаву, къадурмуния тIини, чIурчIав дуллай бия жува ччянива гьаз буллалисса Марияннул фонд баврил масъала щаллу бан аьркиншиврий.
Киров Султанов