Хъинну чансса бакъа ба­къа­хьунссар КIилчинмур ЦIувкIуллал аьрщарайсса, уттизаманнул журалийсса фермалия къакIулсса, къабавсса. Ванийн МахIрамовлул фермагу учай, ПаччахIлугърал Думалул депутатнугу ивкIсса, ххуй-ххуйсса давурттугу дурсса бизнесмен Аьбдулмажид МахIрамовлул дурсса ферма дунутIий. КIанттул агьалиналлив ванийн агрофирма учай. Ферма учингу бучIир, агрофирма учингу бучIир, караматсса тIабиаьтрал карав дирхьусса ферма дия.

Ванил председатель Нажмуттин МахIрамов ур. Аьбдулмажидлул ссурахъу. Жу ахттая мукьах хьунав шикку, бригадир Аьбдуллаев Мансур жун къавлявкъуна. Лявкъуна шикку зузисса Цалчинмур ЦIувкIратусса Кьурбанов Расул ва ванал кулпат Зубайдат. Расул оьрчIнияцIава ятту-гъаттараха зий оьрму гьан був­сса, биялсса опытгу бусса ризкьичи ур. Шиккува кIицI лаган, «Илчилул» хьхьичIсса номерданий, Цалчинмур ЦIувкIравмур аьрххилия буслай, жу бувсъссия шяраву фермерну зузисса ванал чIивима уссийяту, ХIусайн Кьурбановлуя. Оьрмулухун шяраваллил жяматрал ятту ябуллай ивкIсса ххаллилсса адаминал, хIухчу ХIасаннул арсругу, цува куна, захIмат ххирасса, Лакку кIану къакьабивтсса бивзунни.

Расуллул бувсунни фермалий бушиву 550 гъаттара, вайннуву ттизайсса бушиву 35 оьл. Шикку зий бур хIакьинусса кьини ца хIухчу, ца бригадир ва шанма доярка. Фермалий ризкьичитал яхъанансса циняр шартIру къулайсса дур.

Ххулув сенокосилкалул кумаграцIух бувайсса бур. Ферма машина лага-бучIайсса кIанай душиврувугу диялсса къулайшинна дур.
«Нис дайсса завод тана та кIанай буссар. Оптовиктал бучIай машан ласун, укунма ласун бувкIнангу даххару», – увкунни Расуллул.
Марххалтту лув бивхьусса ппурттуву гьаксса захIмат хьуна тIий ур, амма корма, ххулув ххилай, гъаттаран дуканмур чан хьун къаритарду тIар.
Зий, захIмат буллай аьдатсса Расуллун ва Зубайдатлун, вайннал цала тIийкун, «личIину вари чинсса захIмат бакъар».
Зий бур ва фермалий бикIу, агрофирмалий бикIу, захIматчитал, агьалинан накI-нисирал дузалшиннагу дуллай, Лакку кIанугу ябуллай.

ПатIимат Рамазанова