Уттигъанну МахIачкъалалив «Динамо» стадиондалий дия «кIирисса» тагьар – гьавалул дакъача, дроннал бяст-ччаллил хIасул дурсса.
Июньдалул 20-нний шиккун бавтIун бия республикалий яла хьхьичIунми 40 пилот. Вайннал хъунмур мурадгу Дагъусттаннал цачIундур командалуву хьхьичIунсса кIантту бугьаву бия. Вайннава хьхьичIун ливчуми гьуртту хьунтIий бур июльданул 23-нния августрал 3-ннийнин хьунтIисса СКФО-лул лагрулийсса Дроннал чемпионатрай. Шикку ххув хьуминнал хъиривмур мурад Сочилий хьунтIисса Аьрасатнал чемпионатри. Мероприятие тIиртIуна Росгвардиялул зузалтрал щаллу дуллалисса гимнрайну.
Гьурттушинна дуруна бусравсса хъамаллурал: Дагъусттаннал ХIукуматрал председательнал чIумуйнусса хъиривма Ризван ГъазимахIаммадовлул, Халкьуннал Мажлисравусса жагьилтурал иширтталсса бувайсса комитетрал председатель Мурад Пайзуллаевлул, Спортрал министрнан чIумуйнусса кIанайма Сажид Сажидовлул, Жагьилтурал иширтталсса буллалисса министрнан чIумуйнусса кIанайма Камил Саэдовлул, Цифрардал лябуккулул министрнан чIумуйнусса кIанайма Юрий ХIамзатовлул.
Гьурттучитурал хьхьичIун ссаламращал увккуна Дронну леххан даврил федерациялул председатель Саэд ХIажиев. Ванал балжину бувсуна ва спортрал журалия, жагьилтал техникалул дисциплинарттавун кIункIу баврия.
– ХIакьинусса кьини Дагъусттаннал жагьилтал чялишсса гьурттушиннагу дуллай, хIарачат буллай бур цIусса технологиярттал хъирив лаян: цавай трассардай бястлий дронну итадакьлай, цавай ми датIин лахьлай, вайми дакьин дуллай, – увкуна ванал.
Иширайнусса ва хияллайнусса леххаву
Ва чемпионатрай ца яргсса бутIану хьуна дроннал бяст-ччаллих бурган шаву. (Вайннувух уруглагима квадрокоптерданий лехлай усса кунмасса илгьан дакIнивун бухлай, хIаз ласун шайсса бур). Ризван ГъазимахIаммадовлулгу ва хIалу ишла дурна, FPV-лул яруннавух тамаша бувна лехлахисса дроннай. Ва муксса махIаттал хьуну ияхха дроннал дуллалисса увинтирттай ва паргалну лахъ-лагь шаврий, яру букьайхту, бакI гьанай бур тIий ия.
Бяст-ччал хьуна кIива журалийсса: футболданул майданнив кьатIув ва къатраву – компьютердай ххал буллалисса. Дронну леххан дуллалиминнал магьиршиврун багьа бищун багьлай бия гьавалуву ва компьютердаву.
БучIантIимуниясса ихтилат
Бяст-ччал байбишин хьхьичI республикалул идарарттал бакIчитал хьунабавкьуна гьурттучитуращал.
Юрий ХIамзатовлул бувсуна робототехника ва программирование хьхьичIуннай дуллансса планная ва жагьилсса пишакартал давурттал щаллу баврия. КIицI лавгуна 2024 шиналва Дагъусттаннай Пилот акъасса авиациялул системардал элмийсса центр хIасул бувшиву (АНО «НПЦ БАС РД»).
Чемпионатрай гьурттушинна дуруна оьрмулул личIи-личIисса шиннардивусса пилотътурал. Цалчинмур кIану бувгьуна Каспийскалиясса жагьилсса пилот – АхIмад Оьмаровлул. ХIакьинусса кьини Дагъусттан унгу-унгуну зий бур пилот акъасса авиациялуха. Аьрасатнал президентнал указрайн бувну, БПЛА-дайн дагьайсса проектрал лагрулий республикалий кьамул дурну дур грантирдахагу, серийнайсса производствалухагу зунсса тIалавшинна.
Республикалий хIасул бувсса НПЦ БАС хьунтIий бур цIусса гьануну региондалийсса индустриялун, Дроннал чемпионат тIурча, жагьилтурал дянив сийлийсса технологияртту хьхьичIуннай давривунсса цалчинсса шаттирдуну.
Анвар Сагидов
