«Дагъусттаннал шяравалу» тIисса музей-заповедникраву тIиртIунни художница Фироза Панаховал дурсса ссихьрал «Халкьуннал лаххиялул поэзия» цIанилусса выставка.

Шикку дур авторнал каруннил дурсса 50-нния лирчу­сса ссихьри, цалгу ккаккан буллалисса миллатирттал чулухагу, культурардал чулухагу цуксса авадансса кIану буссарив жулва Дагъусттан. Вайннул автор Дагъусттан Республикалул лайкь хьусса учитель, аьм­сса кIулшиву дулаврил Аьрасатнал Федерациялул бусравсса зузала, «Аьрасатнал гьунар бусса жагьилтал» тIисса щалагу Аьра­сатнал конкурсрал лауреат, ОьрчIал искусствардал школалул язисса преподаватель ва цаймигу цIардал заллу бур.
Выставка тIитIлатIисса шадлугъ дайдирхьуна «Дагъусттаннал шяравалу» музейрал директорнал хъиривмур Ирина Хайбуллаевал. Гихунмай махъру лавхъуна маданиятраву республикалий ва ванил кьатIув цIа дурксса ишккаккултрал.
Выставка дикIантIиссар августрал 2-ннин.

Бадрижамал Аьлиева