Республикалий цалчинсса инклюзив выставка
Дагъусттаннал изобразительный искусствардал П. ХIамзатовал цIанийсса музейраву тIиртIунни «Мир на ладонях» тIисса цIанилусса тактильная экспозиция. Ва дур янин чани чанминнансса ва бувагу бакъаминнансса выставка.
Ва хIадур дурну дур Республикалул янин чани бакъаминнансса хасъсса библиотекалул «Центр социокультурных инициатив «Среда+» АНО-ращал цачIуну, «Росмолодежь. Грантылул» чIарав бацIаврийну.
Выставка тIитIлатIисса шадлугърай ихтилатру бунни Республикалул культуралул министрнал хъиривчув Мухтар Кьурбановлул, Изобразительный искусствардал музейрал директор СалихIат ХIамзатовал, Республикалул янин чани бакъаминнансса хасъсса библиотекалул директор ХIажи Маллучиевлул, «Центр социокультурных инициатив «Среда+» АНО-лул учредитель Камила Оьмаровал, Республикалул янин чани бакъаминнансса хасъсса библиотекалул методикалул центрданул хъунмур Жанна Аьлиевал, янин чани бакъаминнал Щалагу Аьрасатнал организациялул Дагъусттаннайсса отделениялул председатель ХавлатIип Назировлул, Дагъусттаннал паччахIлугърал технический университетрал проректор Ширали Юсуповлул, «Дагъусттаннал жагьилсса инвалидтал» организациялул председатель ХIайбулла МахIаммадовлул ва цайминнал.
Ва хъанахъиссар жулла региондалий, хIатта Ухссавнил Ккавкказнавугума, янин чани чанминнан ва бувагу бакъаминнан тIиртIусса цалчинсса выставка. Тти вайннаща бюхълай бур каш-куш куну дунияллул, билаятрал ва региондалул тарихийсса ва архитектуралул объектирдащал кIул хьун.
Проект щаллу давриву хъунмасса захIмат бивхьуну бур Дагъусттаннал паччахIлугърал технический университетрал студентътурал, ва выставкалий дишинсса затирттал 3D-печатьрай макетру дуллай. Мукун вайннал канила бувккун бур республикалул, билаятрал ва дунияллул маданиятрал ва архитектуралул гьайкаллал, Дагъусттаннал изобразительный искусствардал музейравасса экспонатирттал копияртту. Тактильный экспозициялийсса гьарцагу экспонатрацIун щаллу дурну дур тифлокомментарий, яни янин чани бакъаминнансса чичрулий гьарца экспонатрая бувсун бур.
Выставка тIитIлатIисса шадлугърай Республикалул янин чани бакъаминнансса хасъсса библиотекалул буккултрал ккаккан дунни хъун дакъасса концертгу.
Бадрижамал Аьлиева
