Уттигъанну къуртал хьунни 2026 шиналсса Сиражуттин Илиясовлул цIанийсса футболданул Лакрал Кубокрал турнир. Цалчинмур кIану ва турнирданий бувгьунни Ххутрал командалул, кIилчинмур кIану – ЦIуссалакрал командалул, шамилчинми кIаттурду –Хъусращиял ва Читтурдал командарттал. Ва кьини МахIачкъалаллал 11-мур гимназиялул спортрал майданнив хьунни хьхьичIунсса командарттан ва футболистътуран наградартту дулаву.

Мероприятие дачин дурну бия ГьунчIукьатIрал шяравасса Халипа ТIагьиров ва Читтуратусса Руслан ЖахIпаров.
Лакрал Кубокрал турнирданий гьуртту хьуминнан наградартту дулаврий махъ лавхъунни Мираб Илиясовлул. «Командартту турнирданийн хъинну хIадур хьуну дия, ххув хьунни Ххутрал команда. ХIисаврайн ласунсса ишри: Гьашинусса Лакрал Кубокрал турнир хьунни Аьрасатнал Халкьуннал цашиврул шинал. Турнирданул агьаммур мурад бия жула лакрал шяраваллал жагьилтал цачIун шаву, лагма лагаву, миннал дянив дусшиву цIакь шаву, уссурвалшиврий ялапар шаву. ЧIалай бур ва мурад бартлаглай бушиву», – увкунни Мираблул.
Махъ лавхъунни мукунма Лакрал райондалул бакIчину чIярусса шиннардий зий ивкIсса Юсуп МахIаммадовлул, Попечительтурал советрал члентурал Амирхан Амирхановлул, Эмил Ттаттаевлул ва ХIасан ­Аьлиевлул.
Вайннал бувсунни футболданул турнирданух тамаша буллай бивкIшиву, барчаллагь увкунни турнир сакин дурминнахь, хаснува Руслан ЖахIпаровлухь ва Халипа ТIагьировлухь.
Яла хьхьичIунми футболистътуран ва командарттан дуллунни наградартту.
Лакрал Кубокрай хьхьи­чIунма ассистентну ккаккан унни КьурбанмахIаммадов Гъапур, ванан буллунни хасъсса диплом.
ХьхьичIунма бомбардирну ва гол-пасчину ккаккан унни Хъурхърал командалувасса Давуд Аьлиханов, ванангу буллунни хасъсса диплом ва кубок.
Яла ххуйми кулпатрал аьдатру (лучшие семейные традиции) тIисса номинациялий ккаккан бунни Маллааьли ва Шарип Кьурбановхъул – арс ва ппу футболистътал, мукунма МахIаммад ва Аюб Ибрагьимовхъул – арс ва ппу футболистътал.
ХьхьичIунма юниорнан калли унни Сагид Аьлиев (Шахьуйми), хьхьичIунма ветеран хьунни Симран Ттаттаев, хьхьичIунма яла жагьилма тIуркIучину увчIунни Сайпу ХIаммаццаев, хьхьичIунма къапучину (вратарь) ккалли унни Даниял ХIамзатов (Ххут), хьхьичIунма защитникну ккаккан унни Маллааьли Кьурбанов (Читтур), хьхьичIунма гьужумчину – Муртуз Къушаев (Ххут), хьхьичIунма тIуркIучи – ХIасан Шекьиев (Ххут).
Лакрал Кубокрал турнирданий 3-мур кIану бувгьусса Хъусращиял командалун буллунни диплом ва 50 азарда къуруш, тIуркIучитуран – медальлу.
Лакрал Кубокрал турнирданй 3-мур кIану бувгьусса Читтурдал командалунгу дуллунни дурусну микссара наградартту.
Лакрал Кубокрал турнирданий 2-мур кIуну бувгьусса ЦIуссаккуллал командалун булланни мукунма хасъсса диплом, 100 азарда къуруш, тIуркIучитуран – медальлу.
Лакрал Кубокрал турнирданий ххув хьусса Ххутрал командалун буллунни хасъсса кубок, 150 азарда къуруш, тIуркIучитуран – медальлу.

ХIасан Аьдилов