Июньдалул 19-нний МахIачкъалалив, «Рамина» тIисса банкет залдануву бавтIцириннан дакIний личIансса ххаллилсса мажлис бия: 50 шинал хьхьичI Гъумучиял школа къуртал бувсса выпускниктал цачIун бавтIсса. Мукьва классрал выпускниктал цивппагу. Ва даврил сиптачинугу, сакиншинначинугу хьуну ия Рамазан Къушиев.
Мажлис байбишиннин фоейлуву куннан кув къаккавккун диялсса чIун ларгми мякьну гъалгъардай бия. Рамазаннул циняв выпускниктуран хIадур дурну дия хъазамрай лачIай лишаннугу: «1976-2026. 50 лет. Выпуск Кумухской средней школы» тIисса.
Цинявннал, залданул хьхьичIун бувккун, лахъа-хъунну хьунабавкьуна цалва учительница Зоя Къюннуева. Учительницар къаувкуссания, лап куклуну нанисса вагу архIал дуклай бивкIминнавасса ца ххай бикIанссияв. Фойелуву булувкьуну хавардайсса агьлу, гюнгутIул чIу баяйхту, мютIийсса дуклаки оьрчIайн кIура бавну, залданувун бувххун, цала-цала кIанттай щябивкIуна.
Хьунабакьаврил мажлис тIитIлатIисса ихтилатгу бувна Рамазан Къушиевлул. Цащала архIал ванияр 50 шинал хьхьичI ца парталух щябивкIун бивкIсса, цIанасса чIумал личIи-личIисса кIанттурдайх ппив хьусса, личIи-личIисса давурттай, къуллугъирттай зузисса чIунархIал оьрчIахь хьунабакьавугу барча дурну, ванал кIицI лавгуна, школалийсса мутта-оьрмулул гьанурду хьушиву, цума ци ххуллийн уккарчангу, цумур региондалийн, билаятрайн агьарчангу, гьанурду бивзуминнайн барчаллагьрай, Гъумучиял школалул выпускниктурал цIа адаврай дуруччинсса хIарачатрай бивкIшиву ва бушиву.
Мажлисрал тамадяшиву дан Супиян Оьмаровлуйн тапшур бувна. Лакрал гимнрая дайдихьугу дурну, Супияннул бувккуна «Барчаллагь, школай!» тIисса шеъри. Хъирив ба-бакIрах залданувусса экрандалий ккаккан дурна аьпалухьхьун лавгсса Гъумучиял школалул учительтурал ва залданувун бавтIцириннащал дуклай бивкIминнал суратру. Гьарца суратрал лув фамилия, цIа, увсса ва дунияллия лавгсса шингу ккаккан дурну дия. Вай аьпалухьхьун лавгми дакIнин бивчуну, дуаь дурна КьурбанмахIаммад ХIасановлул.
Гихунмай махъ буллуна Лакрал райондалул бакIчи Зураб Куччаевлухьхьун. Ваналгу кIицI лавгуна цанма мудангу пахру бикIайшиву республикалул дуккаврил идарарттаву ца яла хьхьичIунмунин, язимунин ккаллину бусса Гъумучиял школалия, микку дарсру дихьлай бивкIсса учительтурая, ми тачIав дакIниягу къабуккайшиву.
«Школалул цIа хьхьичIра-хьхьичI гьаз дувайсса язисса учительтуралли, Гъумучиял школалий ххаллилсса учительтал зий бивкIссар тарихрал лахъишиврий, хIакьинусса кьинигу миннал цIарду агьалинал зумув дуссар. Гъумучиял школалул хIакьинусса коллективгу мува бюхъулий, хIарачатрай зий буссар, вайннал ккаккиярттая ва хьхьичIуннайшивурттая жува мудангу ххариссару», – увкунни ванал. Дагъусттаннал кIулшиву дулаврил ва элмулул министр ЯхIия Бучаевлул цIаниятусса Барчаллагьрал чагъарду буллуна педагогикалул ветерантуран Зоя Къюннуеван ва Лариса Катаеван. Зоя Къюннуеван райондалул администрациялул цIаниятусса Барчаллагьрал чагъаргу буллуна. Райондалул администрациялул цIаниятусса Барчаллагьрал чагъар буллуна Рамазан Къушиевлунгу. Ванал кIицI лавгуна Рамазан Къушиев миллатрал оьрмулул иширттавух мудангу чялишну хIала уххайсса предприниматель ушиву.
Школалул выпускниктурал хъамариртун дакъая школалун хъамакъабитулун чIири-хъунсса бахшиш дулайсса аьдат. Рамазан Къушиевлул цIанихсса космонавт Муса Маннаровлул холстрай дирхьусса сурат дуллуна школалул директор Соня Макьаевахьхьун. «Ххариссагу бикIай асарду укунсса хьунабакьавурттай, пашманссагу, жула дянива яла лавгсса учительтал, гьалмахтал, учениктал дакIнин бутлай. ХхюцIалла шин чIарах дурккун ларгнугу, ттун зу ттула ученикталнува буру. Зу, цIакьсса кIулшивурттугу ларсун, ххуй-ххуйсса къуллугъирттай зий, агьалинан мюнпатсса давурттавун кьувтIуну зий буру. Гьарма ххуйсса пишакар ушивруцIун, цайминнал къайгъурдугу хьхьичIунсса ур. Гъумучиял школалул сийгу, цIагу бюхттулну ларсун нанисса зуйн цинявннайн нагу барчаллагьрай буссара», – увкуна Зоя АьбдурахIимовнал.
Махъру лавхъуна чIярусса шиннардий Лакрал райондалул каявчину ивкIсса Аьлиев Неъматуллагьлул, мукунма Аьлиев Юсуплул, Мусаев Оьмардул, МахIаммадова Светланал, Каллаева Маринал, Батирова Замирал, Саидов Сиражуттиннул ва цайминнал. Цинявннал цIарду кIицI лаган къахьунссар. Ибрагьимов Рамазаннул бувккуна га кьинисса мажлисран хас бувсса шеърирду оьрус ва лакку мазрай. Дия бавтIцириннал дакIру тяхъа-шад дуккан дувансса викторинартту, конкурсру.
Музыкалулмур программагу яргсса дия. Дагъусттаннал халкьуннал артистътурал Лариса ХIажиевал , АхIмад АхIмадовлул мажлисрал гур дурна. Балайгу учин, хъярчийсса хавардугу бусан сахIналийн увккуна Дагъусттаннал халкьуннал артист, Лакрал театрданул артист Шамсуттин Къапланов. Балайрду увкуна чичу, композитор, музыкант Илияс МахIаммадовлул. Оьрусрай ва лакку мазрай балайрду увкуна Дагъусттаннал лайкь хьусса артистка Нурианна Къаллаевал.
Миннал щаллу буллалисса номердал лях-карах, куннащал куннал ихтилатру буллай, хаварду буслай бия ванияр чIярусса шиннардил хьхьичI Гъумучиял школалул дус бувсса лагма-ялттусса щархъавасса агьлу.
КIицI лаганна ва мажлисрал диркIшиву цамургу ххуйшиву: лакку мазрайсса бушиву. Ва ялагу гьарца инсаннал оьрмулул кьадар школалул оьрмулуцIун, миллатрал тарихрацIун бавхIуну бухьувкун, та кьинисса ихтилатирттава чIиви-хъунну аьч хъанай бивкIшиву 50 шинал мутталийсса лакрал тарихрал лахIзарду.
«Ва жул цалчинсса хьунабакьаву дакъар, куннал куннал хIурмат бушиву ккаккан буллалисса, дусшиву цIакь дуллалисса. Къушиев Рамазаннул ванил хIадуршиндараха зузисса группа шамийла цачIанма бавтIуна, гьарманайн тапшур бувна цумур-дунугу даврил къяртта, – увкуна КьурбанмахIаммад ХIасановлул.
«Школа жун иман, инсап, багьу-бизу, куннал кув чIарав бацIан хъуниминнал кьадру кIулну, лахьхьин бувмурди, кIулшивурттал ва тарбиялул бакIщаращир. Гьантта лаглай, шинну най, аьрщи-чару цIулагай, бачира цIулаган данну, абадлийсса дусшиву!», – шаммардайну къуртал бувна цилва ихтилат Саида Маллалаевал. «Школа ччянива къуртал буварчангу, 50 шинай дусшиву лахъи ларгссар, уттигу дусшиврул бувгьунува буссару», – вай бия ва кьини сайки гьарманал зумувсса махъру. ДакIнийхтуну барчаллагьрай бия ва мажлисрахлу Рамазан Къушиевлуйн ва сакиншиннарал иширттавух ванацIун кабавкьунайн.
ПатIимат Рамазанова
