Аьрасатнал жагьилтурал грантирдал цалчинмур сезондалий Дагъусттаннаясса урчIра проект язи дургьунни. Жагьилтурал конкурсрайн гьан дурсса проектру дия личIи-личIисса, цаннияр ца ххуйсса: фиджитал-спортрая it-конференциярттайн, школалул медиарттая патриот тIуркIурдайн дияннин.
Гьарцагу сипта – му региондалул бучIантIимунил цIанийсса агьамсса ишри. Конкурс хьунни «Жагьилтал ва оьрчIру» тIисса национал проектрал лагрулий.
– На пахрулий ура жучIава укун гьунаргу, гьавасгу, гъирагу бусса жагьилтал буну тIий. Дурмуний гьашиву мадари, сивсуну бакIрайн ласласияра яла захIматми бигарду ва мурадру. Бачияра хьхьичIунмай, цIу-цIусса лахъазантту лахълай. Жугу зул чIарав буссару, – оьвчаву дуллай ур Дагъусттаннал Жагьилтурал иширттал министр Камил Саэдов.
Андриана Аьбдуллаева
