Вай гьантрай Дагъусттаннал бакIчинал бигарду чIумуйну бартбигьлалисса Федор Щукиннул кьамул бунни ттигъанну хъатIи бувсса жулва лакрал кулпат ХIажи ва Милана Ибрагьимовхъул. Федор Щукиннул барча бунни жагьилсса кулпат.
«Зу яргсса байрандалийн кIура даен дурну, цинявннан эбратну ккаккан дунни Дагъусттаннал халкьуннал культура, куннал куннахасса хIурмат-кьимат, марцIсса ччаву. ЧIа тIий ура зун оьрмулул хияллу бартлагаву», – увкунни Федор Щукиннул.
ХIажинахьхьун ва Миланахьхьун ванал буллунни Кулпатрал кьинилун хас дурну, Москавлив хьунтIисса «Россия. Соединяя сердца» тIисса щалагу Аьрасатнал III-мур хъатIал фестивальданий гьуртту хьунсса оьвчаврил чагъаргу.
ХIажи Ибрагьимов ур жагьилсса ишбажаранчи, цувагу творчествалул инсан. ЧIивину унува занай ивкIун ур «Ватан» ансамбльданувун. Биялсса актершиврул опыт бур ванал «Расул ХIамзатов. Мой Дагестан. Исповедь» тIисса хъуннасса проектрал давривугу. Миланал дахьва къуртал бувну бур медучилище. ЦIана ванил оьрмулуву, цIуну язи бувгьусса пиша бакъассагу, байбихьлай бур кулпатрал кюру щащаврил ххуллу-ххагу.
ХIажи буслай ур республикалул бакIчинащалсса хьунабакьаву хар-хавар бакъа ялун дирсса ххаришиврун ккалли дуллай ушиву. Цахра дурсса къулагъасрахлу ванал хъунмасса барчаллагь увкунни Федор Щукиннухь.
КIицI лаган, ХIажинал ва Миланал хъатIул сий щалагу Аьрасатнавух ларгун дия. Вайннал хъатIуй, мачча-гъанми, хъамал, дустал бакъассагу, гьуртту хьуну бур туристъталгу. ХIасил, хъатIи байрандалийн кIура бавну бия.
ХIакьинусса кьинигу вайннал хъатIуя байкъалитIавай буслай бур инсантал, соцсетирдавугу миллиондалия ливчусса инсантурал ххал диргьуну дур ва уттигу дигьлайнма бур ва хъатIуясса видеороликру.
ЧIа учинну жувагу жагьилсса кулпатран оьрмулуву нахIу-хIалимшиву, хъунисса тIайлабацIуртту!
Имара Саидова
