Дагъусттаннал МЧС-рал баян бунни Ккуллал шяраву вай гьантрай, цIу дагьну, кIизивулийсса къатри, миннуцIун ппал ва ттучангу ччувччушиву. Ва иширал хIакъираву цIухху-бусу буван жу Ккулув оьвкуссия.
ЦIувххуминнал мяйжан бунни лакрал миллатран ххуйну кIулсса, аьпа биву, Оьмаров Шяъваннул къатри ччурччушиву. Къатраву, талихIиндаран, цучIав яхъанай къаивкIун ур. Къатраву думургу зат къалирчIун, ччурччуну дур.
Укунсса балардаща бурувччуну лякъиннав циняв. Гьашинусса шин хъуни марххалтту баву, зунттурдал лахIунтту дуцаву къагьану, цаппараннал къатри ччурччуну, хъуни-хъунисса зараллу хьусса шин дур.
Дагъусттаннал МЧС-рал управлениялул вакилтал тавакъю буллай бур цIу дагьаврицIун мюхчаншиву дуручлан. Инсантал ххассал баврил, цIу дагьаврища буруччаврил масъалартту так ца МЧС-райн багьайсса бакъарча, ми гьарца структуралийнгу, каялувчитурайнгу, гьарца инсаннайнгу багьайсса масъаларттур тIий бур. Мунияту, чув-дунугу цIу дагьаврия нигьачIаву дусса иш-тагьар хIисав хьурча, гацIана МЧС-райн ягу цамур ялувбацIаву дуллалисса идаралийн баян буван тавакъю буллай бур.
Бурувччуну лякъиннав кIул бакъа балардаща!
ПатIимат Рамазанова
