МахIачкъалаллал клиникалул азарханалий (хьхьичIвасса Портрал азархана), гьарца шинал кунна, гьашинугу яргну ва тяхъану кIицI ларгунни Медициналул зузалал кьини.
Шадлугърай гьуртту хьунни «МахIачкъалаллал хьхьирил-машлул порт» АО-рал генеральный директор Жамал Аьлиевгу.

Медициналул зузалтрахь пишалул байрангу барча куну, МахIачкъалаллал клиникалул азарханалул ва ваничIасса поликлиникалул хьхьичIунсса зузалтран ванал буллунни Барчаллагьрал чагъарду.

Азарханалул хъунама хIакин, жула лаккучув АхIмад Аьлиевлул, коллектив барчагу бувну, барчаллагь увкунни, гьарца кьини буллалисса захIматрахлу, цала пиша ххирашиврухлу ва ларайсса пишакаршиврухлу. ХьхьичIунсса пишакартуран дуллунни ХIурматрал грамотартту ва Барчаллагьрал чагъарду.
Хъирив азарханалул зузалтрал ккаккан бунни цивппа медициналуву бакъассагу, творчествалувугу итххявхсса, хъярч-махсара бувангу кIулсса, гьарцагу чулуха итххявхсса инсантал бушиву. Ва шадлугърайн вайннал хIадур дурну дия личIи-личIисса творчествалул номердая сакин хьусса хъуннасса программа.

Бадрижамал Аьлиева