Дагъусттаннал капитал ремонтрал фондрал хъуннасса даву дуллай бур Дагъусттаннал личIи-личIисса шагьрурдай дух хьусса къатри дакьин дан, цIу дуккан дан.
Буйнакскалий чIявусса квартирарду бусса ххюва къатлуву, кутIасса чIумуйсса пландалийн бувну, дакьин дан багьлай бур мукьра магъи. Царай къатраву даххана дан багьлай бур лифт. Ми давурттан ккаккан дурну дур 31820580 къурушрайн дирсса арцу. Къатри гьануцIакул дакьин дурну махъ, шиву ялапар хъанахъисса 769 инсаннал багьу-бизулул шартIру къулай хьун най дур.
Къизилюртлив мура кутIасса чIумул пландалий бакьин бан ччай бур чIявусса квартирарду бусса ряхва къатта. Дакьин дан тIий бур къатрал магъив, цIу дуккан дан тIий дур токрал ва щинал системарду. Му бакъассагу, Къизлярдал электричествалул аппаратру байсса заводрал даххана дан тIий дур лифтру. Вай давуртту дан ккаккан дурну дур 35179419 къуруш арцул. Ванийну 1316 инсаннал багьу-бизулул шартIру къулай хьун тIий дур. Ряхва къатлул магъи дакьин дан най бур Хасаврайгу. Ми давурттан ккаккан дурну дур 59,95 миллион арцул. Ванийну 818 инсаннал ялапаршиндарал шартIру къулай хьун най дур. Дакьин дан ккаккан дурсса къатри дур личIи-личIисса шиннардий дурну диркIсса. КIукI дуклай дур, къатраву хъатру дур тIий, ччянияцIава аьрзирдай буссия шиву ялапар хъанахъими.
Андриана Аьбдуллаева
