Нанисса шинал цалчинмур кварталданий Дагъусттаннал чара бакъасса медициналул страхованиялул системалуву зузисса медициналул психологтурал 441 консультация дунни амбулаториялул пациентътуран.

ПишакарначIа укра цIуллу-сагъшиврул тагьар ххал дансса сант дагьунни жула республикалул агьалинан 2023-ку шинал июль зурул 1-нния байбивхьуну. Му чIумалли тIитIлан бивкIсса поликлиникардай профильданул кабинетру. Дагъусттаннал ТФОМС-рал бусласимунийн бувну, яла чlявуну укунсса пишакартурайн бувкми бур диспансерданул аякьалулусса пациентътал. Ми бувкlун бур психологтурачIан кIиттуршлий мукьцIаллий мукьилва. Кlилчинмур кlанай бур оьрчl бан нанисса хъами ва жагьилсса нинухъру. Пишакартурал кьамул бувну бур оьрчl бан нанисса ва бувну махъсса ппурттувусса 193 хъамитайпа. Мукунма, психологтурал кумаг аьркинну поликлиникардайн бувккун бур аьралий иширттал ветерантал. Мукунсса мукьа инсан ур. Медициналул ва психологиялул консультациярду дайсса кабинетру чlяву хъанахъаврилгу буслай бур мукунсса кумаг аьркин багьлагьими гьарза хъанай бушиву. Укунсса консультациярду аьркин дагьлай дур хъунмасса хlаллай вас-ццах багьсса тагьарданувусса, паракьат бакъашиврул, макьу дакъашиврул ва шану бакъашиврул азурда буллалисса инсантуран. Медициналул психологначlан уква, ОМС-рал полисрай, багьаншиврул, къашайшала цува цlакь увсса поликлиникалийсса хlакиннайн уккан аьркинссар. Мунал дулайссар направление, къашайшалал тагьарданиягу чивчуну. Дакlнин бутан, ОМС-рай медициналул психологначlан направление ласун шайссар хасъсса аьралий операциялийминнал мачча-гъаннаща. Хьхьичlва-хьхьичl, хъаннища ва ниттихъаща, хронический къашайшиву дусса, диспансерданул аякьалулусса къашайшалтраща, мукунма хасъсса аьралий операциялия зана хьусса аьралийтураща, захIматсса психикалул тагьарданивун агьну, стресс хьуну ухьурча.

Андриана Аьбдуллаева