Аьрасатнал Халкьуннал цашиврул шинал Алексей Толстойл цIанийсса Брянскаллал областьрал Драмалул театрданул ккаккан дунни А. К. Толстойл ва Ф. И. Тютчевлул произведениярттаясса «Единство в слове» тIисса адабиятрал ва шеърилул программа.
Ва цурдагу хьунни «Международные культурные центры 2026», «Язык театра в диалоге славянских народов» тIисса дунияллул халкьуннал театрал проектрал лагрулий.
Ваний гьуртту хьунни Аьрасатнавасса ва жула билаятращал дусшиврий ялапар хъанахъисса театрду. Миллатирттал театрдава ва хъуннасса проектрай гьуртту хьуну бур так Лакрал театр. А. Толстойл ва Ф. Тютчевлул назмурдавасса бутIри лакку мазрай бувккунни Дагъусттаннал лайкь хьусса артистка Зинаида Чавтараевал, артист ва режиссер Руслан Лариннул. Шеърирду лакку мазрайн бувцуну бур Зулайхат Тахакьаевал. Проект дузрайн дурккун дур Аьрасатнал Культуралул министерствалул кабакьаврийну.
Аминат АхIмадова
