Июньдалул 16-нний Каспийскалий «Азимут» комплексрал конференц-залдануву хьунни СКПА-лул (Северо-Кавказская Парламентская Ассоциация) 13-мур Конференциялул пленар заседание. Ва дачин дурну ия Ассоциациялул председатель, ДР-лул Халкьуннал Мажлисрал председатель Заур Аскандаров.

Конференциялий гьуртту хьунни АьФ-лул сенатор Виталий Назаренко, АьФ-лул СКФО-райсса вакилнал кумагчи Евгений Ткачев, АьФ-лул Госдумалул депутат Нурбаганд Нурбагандов, СКФО-лул субъектирдал законодатель органнал делегациярттал члентал, ДНР-данул Халкьуннал советрал делегация, ДР-лул Халкьуннал Мажлисрал депутатътал.
Байбихьулий Заур Аскандаровлул ДР-лул бакIчинал чIумуйнусса кIанайма Федор Щукиннул, Дагъусттаннал циняв халкьуннал ва парламентрал цIанияту аьла-ссалам бунни СКПА-лул конференциялул гьурттучитурахь.
Ассоциациялул председательнал барчаллагь увкунни законодатель собраниярттавасса даврил уртакьтурахь уттигъанну хьусса тIабиаьтрал апатIрайну бивсса зараллу бухлаган бавриву субъектирттал бувсса кумагирттахлу.
Сенатор Виталий Назаренкол дурккунни АьФ-лул Федерациялул Советрал председатель Валентина Матвиенкол конференциялул гьурттучитурайнсса аьла-ссаламрал адрес.
Евгений Ткачевлул махъ лавхъунни АьФ-лул президентнал СКФО-райсса вакил Юрий Чайкал цIанияту.
ДР-лул бакIчинал ва ХIукуматрал председательнал Администрациялул каялувчинал цалчинма хъиривчу Аьли Ибрагьимовлул ДР-лул бакIчинал чIумуйнусса кIанайма Федор Щукиннул цIанияту аьла-ссалам бунни СКПА-лул конференциялул гьурттучитурахь.
Яла конференциялул гьур­ттучитурал ххал бивгьунни 14 масъала, миннувух бур Ухссавнил Ккакказуллал парламентирттал законнал проектру ва лабизавутту, ми тIайла дуккан тIий дур Госдумалийн ва АьФ-лул ХIукуматрайн. Ми дур социал сфералийн, СВО-лул гьурттучитурайн ва миннал кулпатирттайн, дуккаврил иширттайн, паччахIлугърал къуллугърайн, аьрщи ишла даврийн, шяраваллил хозяйствалийн, налогру дишаврийн, АьФ-лул субъектир­ттал жяматийсса палатарттал давурттайн дагьайсса законнал проектру.
Депутатътурал хIукму хьунни мукунма СПКА-луву дузал буван Хасъсса аьралий операциялул ветерантурал ва гьур­ттучитурал комитет.
Му бакъассагу, парламентарийтурал кабакьу бунни СКФО-рал субъектирттал законодатель органнаву жагьилтурал парламентирттал ассоциацияртту дузал даврил пикрилуцIун. Ва сипталия бувсунни ДР-лул Халкьу­ннал Мажлисравусса Жагьилтурал парламентрал председатель Хочбар Баракаевлул.
СКПА-лул 13-мур конференциялий кьутIирду чирчунни ДР-лул Халкьуннал Мажлисравусса Жагьилтурал парламентрал ва Ухссавнил АьсатIиннал- Аланиянал, Чачаннал Республикалул ва Ингушетиянал Республикалул Жагьилтурал парламентирттал дянив уртакьну зузаврил хIакъираву.