Июнь зуруй щалагу жула билаятрай кIицI лагай Медициналул зузалал кьини. Лахъа-хъун бай агьалинал цIуллу-сагъшиврул къаралданий бавцIуми.
Медициналул зузалал пиша оьрмулул мяъна-мурадну хьу­сса, ва ххуллий хъунмасса захIмат бивхьусса ва чIярусса лайкьшивуртту хьун дурсса пишакартал лакраву чансса бакъар. Миннавасса ца бур медициналул идарарттай зий 50 шин дурсса лавайсса даражалул хIакин, Дагъусттаннал лайкь хьусса хIакин, Ваччиял шяравасса Имраннул душ Асият Сулаймановагу.

Асиятлул захIматрал ххуллу байбивхьуну бур 1969-ку шинал Ккуллал райондалул санэпидстанциялий медициналул статистну. 1975-ку шинал Дагъус­ттаннал медициналул институтрал лечебно-профилактический факультет къуртал бувну махъ педиатриялул интернатурагу бувккуну, ва зун бивкIун бур Каспийскаллал оьрчIал поликлиникалий участокрал педиатрну.1977-1979-ку шиннардий зий бур ЦIуссалакрал райондалул азарханалий педиатрну. Ва зузи­сса шиннардий ЦIуссалакрал райондалий оьрчIал цIуллу-сагъшиврул ялув бацIаву лавай­сса даражалийн гьаз хьуну дур. Райондалул жямат Асият Имрановная хъинну рязину бивкIун бур. ВаничIа цIанагу яхьуну бур танийва цихьва барчаллагь тIий чивчусса райондалул кказит.

Шанна шинавусса оьрчIал чIявусса даруртту бувкуну, оьр­мулун нигьачIисса тагьарданувун агьну, му иширая кIул шайхту, мугьлат бакъа оьрчI хха­ссал ансса чаран лявкъуну бур Асиятлул. 1981-ку шинал Асият Имрановна зун бивкIун бур МахIачкъалала шагьрулул 1-мур оьрчIал поликлиникалул отделениялул хъунмурну. Шикку зий бивкIун бур сайки 40 шинай. Ва даврийгу ванил ккаккан бувну бур цуппа кIулшивуртту дусса хIакин, лавайсса даражалул пишакар бушиву. Му бакъассагу, шагьрулул 1-мур оьрчIал поликлиникалул парткомрал секретарьная профкомрал председательнал къуллугърайн бияннин чялишсса гьурттушинна дуллай бивкIун бур жяматийсса иширттавугу. Асият бухлай бур Аьрасатнал Педиатртурал союзравун. Ва бур мудангу цила кIулшивурттал даража хъиннува гьаз бан ялув бавцIусса, чIумул тIалавшиннардаха лавхьхьуну зун хIарачат буллалисса хIакин. Гьуртту хьуну бур оьрчIал ва чIаважагьилтурал масъаларттал хIакъиравусса Щалагу Аьра­сатнал конференциярттай Калугалий, Къазаннай, Воронежрай. БивкIссар педиатртурал VII Конгрессрал делегатну Москавлив.

Чув зий бухьурчагу, Асият Имрановнал даврил хIасиллу мудангу ккаккиялунсса дур. Школалийн гьаннинсса ва школалул оьрмулувусса оьрчIал цIуллу-сагъшиву дуруччаврил ххуллий мудангу ттизаманнул цIушиннарду ишла дуллай, чIумуха лавхьхьуну зий бия. Асият бивкIун бур МахIачкъалаллал ва чIарахсса поселокирттал школардал ва школалийн гьаннинсса оьрчIал идарарттал штатрал кьатIувсса хъунмур пишакарну. Инса­ннал марцI-чапалшиврул, эпидемиялийн къарши бацIаврил масъаларттаву кумаг буллай бивкIун бур шагьрулул школардан ва школаллийн гьаннинсса оьрчIру бусса идарарттан. Ва хъанахъиссар шагьрулий ва щалагу республикалий оьрчIащал зузисса жагьилсса пишакартурал насихIатчи. Муданма Жагьилтурал иширттал министерствалущал хIала-гьурттуну зий, Асият Имрановнал хъунмасса кабакьу байссар гьарица шинах гъинттул чIумал оьрчIру бигьалагаврил даву сантирайн дутан. Кьунияхъайсса шиннардий ва бивкIссар Дагъусттаннал оьрчIал цIуллу- цIакьшиврул идарарттал хIакъиравусса ведомстварттал дянивсса комиссиялуву. АцIнияхъайсса шиннардий ххишаласса жаваблувшинна дусса лавайсса даражалул хIакин хIисаврай ва гьан байсса бивкIссар президентнал программалий дазул кьатIув, Аьрасатнал шагьрурдайн нанисса чIявусса оьрчIру бусса коллективирттащал, мукунма нину-ппу бакъасса детдомирттавасса оьрчIру Кремлилул елкалийн бувцуну нанийни.

Ваниву дур гьарицагу хIа­киннаву дикIан аьркинсса хасиятру: пишалухсса ччаву, жаваблувшиву, циярасса хъуннасса тIалавшинна, инсаншиву, цIими бушиву, ччимур чIумал кумаг бан хIадуршиву. Вай хасиятиртталгу хъиннува бусрав бувну бур ва даврил уртакьтуран ва лагма-ялттунан. Гьарица ишираву инсаннан кумаг бан, чIарав бацIан, цаманал буруккин кIибачIин анавар буккайсса инсан бур Асият. Ва ххирар оьрчIангу, хъуниминнангу.Пишалул ххуллийсса ва жяматийсса давурттайсса ккаккиярттахлу ва лайкь хьуну бур хIурматрал грамотарттан, профсоюзрал чулухасса. «Надежда России» тIисса Щалагу Аьрасатнал хъаннил союзрал жяматийсса организациялул чулухасса медальлан. 2021-ку шиная шихунмай, хIакьинусса кьинигу, Асият Имрановна зий бур «ЭОС» тIисса медициналул центрданий. Чув бухьурчагу, ванил маслихIатру, насихIатру бучIи лякъай архIал зузиминнан.

Пишалул байрангу барча тIий, чIа тIий буру Асият Имрановнан цIуллушиву, ххаришивуртту, дуллалимуниву тIайлабацIу, хьхьичIуннайшивуртту.