На мудангу пахрулий ва хIурматрай кIицI лагара Ккуллал район – цIанихсса ризкьичитурал район, миллатрал колорит ядуллалисса район. Ххишала дакъа ххари хъанай дия дакI фольклорданул фестивальданий жула мяйжаннугу авадансса культура, аьдатру, миллатрал лаххия, миллатрал канил пагьмурду чIалай бушиврия, «Бартукь» ва «Вихьлидуш» ансамбльлал билаятрайцири хIайран буллай бушиврия.

Цаппара шяраваллавух бувксса жул дакIру ххаришиврул дуцIин дуллай дия цIу-цIусса, ххуйсса къатри дуллай бушиврулгу. Дурссагу, дуллалиссагу Цалчинмур ЦIувкIравгу, СунбатIливгу, Ваччавгу чан­сса дакъая. Яхъанансса къулай­сса шартIругу дусса, гьармунилгу дузалсса. Жула ппухълуннан макIра къаккаккансса даражалийсса куннасса. Къулайши­ннардайнна гьим дуллалисса.

Щил ци учирчангу, бу­ттахъал дурсса цIувцIу чарттал къатрими ябатIин къашайсса ххуйшивуну чIалан дикIай. Зун­ттал архитектуралул гьайбат личIири.
Шяраваллавусса гьаннуми кIяланура дия, уртту хъанан дурая. Май зурул ахирданийра шайсса хIурия-тIутIив дахьра ххяхлай дия. Аьдатрайн бувну, вай школа къуртал бувминнан пишкаш дувайссия Махъва-махъсса гюнгутIул кьини цалчинмур классраву дуклаки оьрчIал. Школа къуртал бувния махъ ссунтI учиннагу къадирирсса вай тIутIал кацIлищал бувкIра нагу ялавай. Фермер ХIусайннул кулпат Аьйшатлуйнгу барчаллагь тIий, вай пишкаш дуваврия. МахIачкъалаливсса квартира Ватандалул тIутIал кьункьал янхьлил буцIин баврия нава, чанна-чанну нюжмардий неъмат ласлансса кIулну.

Аьдатрайн бувну, ялавай нани ххуллий Ханнал щаращучIа щябивкIун, чяйгу хIачIарду. Буттал улклухь «Хъинну бикIу!» тIисса журалий. Утти Ханнал щаращучIа битавсса аслан кунма жува щябикIай кIану ябуллалисса залунсса кьунгу бухьувкун. Цуппагу кIа цинявннан ххирасса кIанттул чулухун тIайлабавцIуну, кIия, зунттава ккуру лавгун. ТIабиаьтрал, ина вана ва кIанай шикку бацIан аьркинссара къаралчину увку­сса кунма.

ЗахIмат ххирасса, сивсусса, савсъсса, кьянкьа дан багьний дакIру кьянкьасса, ттюнгъашиву аьркинний дакIру кIукIлусса, хъамал сахаватну кьамул бангу, тIайла буккангу кIулсса Ккуллал райондалул жямат! ЧIаххув-чIаравва бунугу, гьарца шяраваллил цила лугъат дусса (вагу ца аваданшиву!) цила культура, аьдатру, лаххия дусса жямат.
Аллагьу Тааьланал кабакьиннав жуцIунма районгу ядан, цIу дуккангу дуван.

ПатIимат Рамазанова