Гьашину Дагъусттаннай 14000-нния ливчусса выпускниктурал дуллалиссар экзаменну. Аьмну экзаменну дуллан хIадур бувну буссар 65 гьануми пунктру (ППЭ), мукунма 4 пункт УФСИН-далул майданнай. 4 пункт буссар учительтал шаппай бучIан бувну экзаменну дулайсса. Ва цIуллу-сагъшиврул тагьар сававну гьунумур пунктрайн бучIан къашайсса выпускниктурансса чаранни.

Дагъусттаннай ларгсса нюжмардий математикалул ЕГЭ дуллуну дур 12000 выпускникнал. Профильный язи дургьуну дур 2612 инсаннал, 9307 инсаннал – базовый экзамен. Математика — аттестат ласуншиврул чара бакъа дулун аьркинсса кIилчинмур экзаменни. Профильданул экзамендалул 27 балл ласун аьркинну бур, базовый экзамен дуллалиминнан «3» ласунну дулурчангу аттестат булунтIий бур. Профильный ЕГЭ-лул хIасиллая рязи бакъаминнаща базовый даражалийн руртун экзамен дулун хьунтIий дур луртандалун ккаккан дурсса кьини.

Химиялул экзамен дуллуну дур 4334 выпускникнал, историялулсса – 1777 выпускникнал. Литературалул экзамен язи дургьуну дур 164 выпускникнал.
Ва нюжмардий итни кьини тIурчарив, биологиялул, географиялул ва кьатIаллил билаятирттал музурдил ( чичрулинуйсса) экзаменну дуллуссар. Школардай вай экзаменнансса 52 пункт (ППЭ) тIивтIуну буссар, 2 пункт – цIуллу-сагъшиврул нукьсансса оьрчIал ичIура дулунсса. Биология яла чIявуми выпускниктурал язи дургьусса экзамен хъанай дур. 4680 инсаннал биологиялулсса дуллуну дур экзамен, 561 выпускникнал – ингилис мазралсса ва 1 выпускникнал – немец мазралсса. 135 выпускникнал дуллуну дур географиялул экзамен. Биологиялул ва географиялул ЕГЭ-рдал хIасиллу кIул хьун аьркинссар июльданул 1-ннин, кьатIаллил билаятирттал мазурдилсса – июльданул 3-мур кьининияр гихуннай чIал къадурну.

ПатIимат Рамазанова