Августрал 16-нний Республикалул каялувчи Рамазан АьбдуллатIиповлул каялувшиврулу ххал бивгьунни Аьрасатнал Федерациялул субъектирдайсса ДР-лул ХIукуматрал вакилханардал давурттайн багьайсса масъалартту.
Рамазан АьбдуллатIиповлул мукъурттийн бувну, вакилханардал каялувчитурал тамансса хIарачат буллай бур Дагъусттаннал сий гьаз дан. Амма хIала-гьурттусса давурттаву хьхьичIуннайшиву хьуншиврул, аьркинссар дузал бан хасъсса материальная база. Республикалул хъунаманал увкусса куццуй, вакилханардал агьамми задачарттуну хъанахъиссар республикалул цайми субъектирдащалсса машлул ва экономикалул, культуралул ва политикалул арарду дузал дуллалаву.
Рамазан АьбдуллатIиповлул цаппара министерстварттайн тапшур бунни ца нюжмардул мутталий хIадур дан ялун нанисса чIумал вакилханардал щаллу дан аьркинсса давурттал модель, миннувух дикIан аьркинссар промышленностьрал ва машлул бутIравусса проектругу.
Центральный федерал округрайсса машлул вакилханалул каялувчи МахIаммад Сайгидовлул, ДР-лул ХIукуматрал Хабаровскаллал крайрайсса вакил Бейдуллагь Исяевлул, ДР-лул хIукуматрал ЯНАО-лийсса (Ямало-Ненецкий автономный округ) вакил МахIаммад ГьитIиномахIаммадовлул бувсунни субъектирдай цалла дуллалисса давурттал хIакъираву.
ДР-лул миллатирттал политикалул министр Татьяна Гамалейл бувсмунийн бувну, хъуннасса мяъна дуссар Аьрасатнал регионнащал культуралул чулухасса дахIавуртту щаллу даврил ва ми иширттавух тийх ялапар хъанахъисса дагъусттанлувталгу хIала буххан баврил.
ДакIнийн бутанну, билаятрал регионнай цIана зий буссар Дагъусттаннал 43 вакилхана, миннувату 3 муданма зузиссар Санкт-Петербурглив, Ставрополлал ва Краснодардал крайрдай, ливчIми – жяматийсса (общественный) даву хIисаврай. Миннал тамансса давуртту дуллалиссар регионнай Дагъусттаннал сий гьаз дан.
ХIадур бувссар
ХI. Аьдиловлул
