Август зурул 13-нний Каспийск шагьрулий «Кубок моря-2016» тIисса Дунияллул халкьуннал хьхьирил аьралуннал конкурсрал хIасиллу дунни. «Кубок моря-2016» конкурсраву ххув хьуми шадлугърал даражалий барча бунни.
Имара Саидова
«Ва конкурсраву гьуртту хъанахъисса командартту дуссия ацIвахъул гьантрай бястлий дурккун. Бяст-ччаллу най буссия Аьрасатнал, Къазахъисттаннал ва Азирбижаннал хьхьирил флотилиярдал командарттал дянив. Вай бяст-ччаллаву цалчинсса кIану бувгьунни Каспийскаллал флотилиялул «Углич» тIисса ракетный корабльданул экипажрал. Ва командалул конкурсрайсса шаннагу этапрай лавсунни 192 балл ва вайннан дуллунни бахшиш – хьхьирил катер», — увкунни Аьрасатнал Минобороналул Аьрали ва Хьхьирил флотрал вакил Игорь Дыгалол.
КIилчинмур кIану кIибавчIунни архIалсса баллу лавсъсса Къазахъисттаннал «Орал» тIисса ракетный артиллериялул экипажрал жамилул ва G-124 Азирбижаннал аьрали жамилул командалул. Вай командарттан бахшишран дуллунни «Адмирал 480» тIисса моторный лодкарду.
Мукунна командарттан дуллунни медаллу ва хIурматрал грамотартту. Ххув хьуминнан наградартту дуллай бия Каспийскаллал флотилиялул командованиялул вакилтал, Азирбижаннал ва Къазахъисттаннал аьрали-хьхьирил делегациярдал каялувчитал ва ДР-лул ХIукуматрал вакилтал.
Ахирданий Каспийскаллал флотилиялул аьрали оркестрданул ва ПаччахIлугърал хореографиялул «Дагестан» ансамбльданул артистурал хъамаллуран ккаккан дунни концерт.
Дунияллул халкьуннал хьхьирил аьралуннал конкурсрал даву къуртал дунни байрандалул салютирттайну.
