Халкьуннал такьвалущалсса байран

Июньдалул 10-14-нний жулла республикалий хьунни фольклорданул ва аслийсса культуралул Дунияллул халкьуннал дянивсса ХХIV «Горцы» фестиваль. Сайки кьуния ххюра шинни региондалул культуралувугу, халкьуннал творчествалувугу яргсса, агьамсса иширан ккаллисса ва фестиваль дуллай.

Фестиваль хьунни Дагъусттаннал Культуралул министерствалул ва Халкьуннал творчествалул къатлул сакиншиндарайну. Вайннал чIарав бацIаву дунни Дагъусттан Республикалул БакIчинал ва ХIукуматрал, Аьрасатнал Федерациялул Культуралул министерствалул.
Фестиваль дайдирхьунни июньдалул 10-нний МахIач­къалаллал хъун-майданнив, жулла республикалул муниципалитетирттаясса, Аьрасатнал регионнаясса ва дазул кьатIатусса творчествалул коллективирттал парадрайну. Гьашинумур фестивальданул гьурттучитуравух жулла республикалул творчествалул коллективирттацIун бия Беларусьнавасса, Къиргъисттаннаясса, Индиянавасса, Севастополлаясса, Башкортосттаннаясса, Къалмукьнавасса, ЯкьутIиянавасса, Чачаннал Республикалиясса, Къабардин-Балкьарнавасса, Ингушетиянавасса, Луганскаллал Халкьуннал Республикалиясса, Ставрополлал крайраясса, Новгородуллал областьраясса ва цаймигу кIанттурдаясса хъамал.
Фестивальданул лагрулий гьарца кьини Оьруснал театрданул хьхьичIгу, С. Стальскийл цIанийсса бульварданийгу най дия оьрчIансса ва оьрмулул хъуниминнансса личIи-личIисса шадлугъру: «КъавтIаврил территория» майдан, «Фестивальданул открыткарду» цIанилусса концертру, «Аьрасатнал чIурду» цIанилусса халкьуннал балайрдал байран, халкьуннал канил пишардал усттартурал дурмунил выставкарду, мастер-классру ва цамур.

Июньдалул 11-нний, фестивальданул кIилчинсса кьини, цIакь хьусса аьдатрайн бувну, жулла республикалул хъамал – «Горцы» фестивальданул гьурттучитал, лавгунни республикалул муниципалитетирттайн, шиккугу кIантту-кIанттурдай байранну дуван. Щак бакъа, уку-укунсса аьрххирдал кумаг буллалиссар личIи-личIисса миллатирттал дянивсса дусшиврул ва культуралул арарду хъиннура цIакь дуван, куннан кув хъиннува ххуйну бувчIин ва кIул хьун, цалламур культура цайминнан ккаккан дуван ва цайминналмунищал цивппагу кIул хьун. Укун, республикалул хъамалгу гьурттуну, ва кьини Ххунзахъиял райондалий хьунни бартбисурттал байран, Ккуллал райондалий – «ЦIувкIул» цIанилусса халкьуннал аьдатирттал байран, Хайдакьуллал райондалий – халкьуннал балайрдал «Жува цачIу буссару» тIисса байран, Ахъушиял райондалий – «Ахъушиял-Бархъаллал майдан», УнцIукIуллал райондалий – «УнцIукIуллал накьичру» тIисса байран, МахIарамккантуллал райондалий – «Дунияллул аьшукьтал» тIисса байран, Къизилюртлив – «Халкьуннал аьдатру» байран, Къизилюртуллал райондалий – «Чиркейские зори» байран, Дарбантлив – «Дарбант – цивилизациярттал шанбачIу», Хасаврай – «Жулла аьдатру» ва Каспийскалий «Каспий, ты со мной» фестиваль. Ккуллал райондалий Ваччиял шяраву ва кьини хьусса байрандалий гьуртту хьунни ЯкьутIиянал Республикалиясса «Кэрэ куо» ансамбль. Культуралул къатлул жанахIраву тIивтIуну бия райондалул 14-гу шяраваллил майдан.
Ахъушиял райондалийсса Ахъушиял-Бархъаллал байрандалий гьуртту хьунни Башкортосттаннал Республикалиясса халкьуннал къавтIаврил «Тимер» ансамбль.
Коллективру муниципалитетирттайн лавгун бунугу, шагьрулийгу шадлугъру чан дакъая – С. Стальскийл цIанийсса бульварданий Индиянавасса, Туркманисттаннаясса, Къиргъисттаннаясса, Ростов-на-Дону, Новочеркасск шагьрурдаясса ва Самарский областьраясса усттартурал канил давурттал выставка тIиртIуну дия. Жулла республикалулми усттартурава выставкалий гьуртту хьунни Дахадаевуллал ва Дарбантуллал районная­сса усттартал.
Бала-гьалайрдал лахъсса чIурду, тяхъашивуртту дия оьрчIансса «КъавтIаврил территория» тIисса цIанилу тIивтIусса майданнив. Ши­кку бия МахIачкъала ва Каспийск шагьрурдал оьрчIал искусствардал школардайн заназими. Ва кьини ахттакьуннай тIурча, вайми кьинирдай кунна, шикку хьунни «Фестивальданул открыткарду» концерт. Ваний гьуртту хьуминнавух бия ЦIуссалакрал райондалиясса творчествалул коллективгу.
Ва кьини Оьруснал театрданул хьхьичIмур майданнив куннил хъирив кув ккаккан дунни шанна концерт. Вайннуй гьуртту хьунни Лакрал ва ЦIуссалакрал районнаясса творчествалул коллективругу.

Республикалул хъамаллурава тIурчан гьуртту хьунни Удмуртиянавасса, Луганскаллал Халкьуннал Республикалиясса, Ухссавнил АьсатIин-Аланиянавасса, Чачаннал Республикалиясса ва Новгородуллал областьраясса коллективру.
«Горцы» фестивальданул лагрулий ва Аьрасатнал Кьинилул хьунин Къизлардай хьунни казактурал культуралул «Слава казачья» цIанилусса байран.
Фестивальданул шамилчин­сса кьини С. Стальскийл бульварданий хьунни цIуллу-сагъшиврул ссуссукьусса оьрчIансса, «Жува цачIу буссару» тIисса цIанилусса инклюзив майдан. Гихуннай хьунни пагьламантуралмур байран.
Июньдалул 12-нний, Аьрасатнал кьини, Ма­хIачкъалаллал хъун-майданнив хьунни ва байрандалун хас дурсса хъуннасса концерт.
Вара кьини хьунни Аьрасатнал халкьуннал «Жула Аьрасат – жула Дагъусттан» тIисса цIанилусса форум.
Фестивальданул ливчIми гьантрай хьусса яргсса шадлугъирттавух дия «Халкьуннал цашиву – оьрчIру» ва «КъавтIаврил дуниял» флешмобру, «Халкьу­ннал лаххиялул поэзия» байран, фестиваль къуртал хъанахъисса гала-концерт.

– Гьантрал мутталий жулла республикалул хъуншагьру ва районну дия халкьуннал музыкалул, къавтIавурттал ва канил пишардал такьвалий. Ва ххуллухьгу тасттикь хьунни аслийсса культуралухсса гъира шиная шинайн лавай хъанай бушиву. Барчаллагь республикалул бакIчинан ва ХIукуматран, билаятрал ва региондалул Культуралул министерстварттан, цалла маданият, цалла дакIурдил гъилишиву жучIанна ларсун бувкIсса коллективирттан. ЛяличIиссава барчаллагь жулла республикалулми коллективирттан, цалгу жула халкьуннал культуралул куртIшиву, ххуйшиву лайкьну ккаккан дурсса.
Барчаллагь районнал бакI­читуран ва культуралул зузалтран кIантту-кIанттурдай ккаккан дурсса хъамал ххирашиврухлу ва сакиншиннарал лайкьсса даражалухлу, – тIий бур Дагъусттаннал культуралул министрнал хъиривмур, Республикалул Халкьуннал творчествалул къатлул директор Марита МухIадова.

Бадрижамал Аьлиева