«Единая Россия» партиялул ссуттилсса бувчIавурттайнсса кандидатътурахлу чIурду булаврил (предварительное голосование) хIасиллу дунни. Партиялул председатель Дмитрий Медведевлул бувсунни, сайки 10 миллион агьалинал цала граждан позиция ккаккан бувшиву праймеризрай ва СВО-лул 480 гьурттучи хьхьичI ххуттай ушиву. Аьмну СВО-лий гьуртту хьусса 1300 инсанная заявка дуркIун дур.

Кандидатътурал сияхI партиялул цIакь дуван тIий дур июньдалул 28-нний хьунтIисса съездрай.
ХIасиллу дунни «Единая Россиялул» Дагъусттаннаймур отделениялулгу. Аьмну регистрация дурну дур 600 кандидатнал, вайннавату 526 инсаннал – Халкьуннал Мажлисравун, 69 инсаннал – ПаччахIлугърал Думалувун. ЧIурду булаврил электрон журалий гьуртту хьуну бур 207 азарунния ливчусса инсантал. ХIасиллу укунсса ­хьуну дур: Жамал Кьасумов – 72 070 чIу, Шуми Шабатаев – 60 057, ТIагьир Хайбуллаев – 57 214, Сапижат Мазаева – 52 997 ва Мамед Абасов – 42 840.
Яла хьхьичIунми ххюйннавух бур Сапижат Мазаевагу. Сайки 53 000 (шанма чIу чанну) инсаннал ванихлу буллуну бур чIу.
Халкьуннал Мажлисравунсса кандидатътурал сияхIрай цIакь хьунни Артур Исрапилов (ЦIуссалакрал райондалия), Марат Илиясов (Лакрал райондалия) ва Артур Амутинов (Ккуллал райондалия).
Депутатътал барча булланну ссуттил, вайннал хIарачатгу, бюхъу-бажаргу республикалул агьалинангу, жула миллатрангу мюнпатсса хьуннав тIисса хьул бивхьуну.

ПатIимат Рамазанова