ЦIуссалакрал райондалий «Модернизация школьных систем образования» тIисса федерал программалул лагрулий цIусса дуккаврил шинал дайдихьулийнин гьануцIакул бакьин бантIий бур ТIюхчардал ва ЦIуссаккуллал школарду.

Шиккува бусан, кIицI ларгсса федерал программалул лагрулийсса давуртту дан ккаккан бувну буссия 2022-ку шиная 2026 шинайн бияннин. Аьрасатнал президентнал хIукмулийн бувну, программа лахъи лаган дурну дур 2030 шинайннин.

ЦIуссалакрал райондалул администрациялул бакIчи МаматIи ХIамзатовлул гьарица нюжмардий укIлай, ххал дигьлай ур идарарттай дуллалисса давурттал тагьар. Ванащал даврил ялтту буккан букIлай бур ЦIуссалакрал райондалул КIулшиву дулаврил управлениялул хъунмур Светлана Къудаева ва райондалул архитектуралул ва строительствалул отделданул хъунама Цаххай Базанов.ГьануцIакул бакьин бантIий бур школалул вивсса ва кьатIувсса чIиртту, пищеблок, спортзал, классру. ЦIу буккан бантIий бур школалул лагма-ялттусса кIанттурду.

ХIакьинусса кьини ЦIуссаккуллал 2-мур школалий дайдирхьусса давуртту 15% дурну дур, ТIюхчардалмур школалий –17% .
ДакIнин бутанну, ремонтру дуллалишиву «Молодежь и дети» тIисса миллатрал проектрал лагрулий. Вара проектрал лагрулий школарду бакьин баву бакъассагу, педагогтурал пишакаршиву ларай даву мурадрайсса курсругу бур. Му бакъассагу, цIу буккан бантIий бур школардайсса материал-техникалул база ва идарартту террордания ва цIу лачIаврия мюхчан буллалисса система.

Мукунна щаллу дантIий дур кIулшивуртту дуллансса, оьрчIру итххяххан буллансса ва спортрахун бичинсса шартIру. КIулшивуртту дулаврил шартIру цуксса дузалну дурив, муксса оьрчIарал кIулшивурттал даражагу лавайссар.

Имара Саидова