Сагидлул арс Цургъулов Шамил
Оьрмулул 76 шинаву, хар-хавар бакъа лавмартсса цIуцIаврил жуятува личIи увунни, ххаллилсса зунтталчув, Гъумучиял шяраватусса Сагидлул арс Шамил Цургъулов.
Шамил увну ур Гъумук 1949 шинал Сагидлул ва Муслиматлул кулпатраву. Къуртал бувну бур Гъумучиял школа. Армиялияту зана шайхту, увххун ур Дагестанский политехнический техникумравун. Муния махъ зун айивхьуну ур цала пишалий, «Дагрыбпромрал» чавахъ бугьай жамилий микI байсса рефрижераторданул механикну. Зий ивкIун ур Обком КПСС-рал, МахIачкъалаллал горисполкомрал хъун къатрал механикнугу.
Махъсса 33 шинай Шамил зий ия Оьруснал драмтеатрдануву хъунама инженерну, энергослужбалул каялувчину.
Ва ия ххишала акъа яхI-къириятрал увччусса, ларайсса мяърипатрал ва чувшиврул заллу. Ци банссар, Аллагьнал чичру мукунсса духьунссия.
Шамил аьпалухьхьун лагаврил пашманшиву кIидачIлай, дакIнийхтунусса жижара буллай буру кулпатрахь ПатIиматлухь, душнихь Наидахь, ссийхь Написатлухь ва щалагу агьлу-авладрахь.
Алжан нясив баннав, имандалий лавгун хьуннав.
Гъумучиял жямат, гьалмахтал
Багьзадлул арс МахIаммадов МахIаммад-Шапи
Хар-хавар бакъа къюкI цIун хьуну, оьрмулул 65 шинаву жуятува батIул хьунни гьарца чулуха хIал бавкьусса, дакI-аьмал уздансса чув-адамина, Карашрал шяраватусса Багьзадлул арс МахIаммадов МахIаммад-Шапи.
МахIаммад-Шапи увссар 1961-кусса шинал Карашрал шяраву. 1978-ку шинал Карашрал къутандалийсса дянивмур даражалул школагу бувккуну, увхссар Дагъусттаннал паччахIлугърал педагогикалул институтравун. Ва институтрал математикалул факультет къуртал бувну махъ, 1987-ку шиная шинай, хIакьинусса кьинилийн ияннин, МахIаммад-Шапи зий уссия цалва бувккусса школалий математикалул ва физикалул учительну. 1988-1991-ку шиннардий зий уссия вава школалул директорнугу. Карашрал жяматралгу, цува зузисса коллективралгу дянив МахIаммад-Шапи ия бусрав, сий ххишаласса инсан, оьвхъусса зузала, итххявхсса учитель-специалист.
МахIаммад-Шапи аьпалухьхьун лагаврил пашманшивугу кIидачIлай, дакIнийхтунусса жижара буллай буру кулпатрахь Раисатлухь, арсурваврахь Расуллухь ва Рустамлухь, душнихь Луизахь ва махъсса цинявппагу уссур-ссуннахь.
МахIаммад-Шапинал бунагьирттал аьпа баннав, рухI бигьаний дишиннав.
Карашрал жямат
