Августрал 12-нний дайдирхьунни Венгриянаву Дунияллул халкьуннал дянивсса «Саммерфест – 2016» фольклорданул фестиваль. Мунил лагрулий най дур Венгриянаву Дагъусттаннал халкьуннал творчествалул кьинирдугу. Фестиваль цурдагу, муний­сса Дагъусттаннал халкьуннал творчествалул кьинирдугу лахъи лагантIиссар ва зурул 22-ннийнин.

Бадрижамал Аьлиева
«Саммерфест – 2016» фестиваль дуллай бур 23-чин, ва хъанай дур Центральный Европанаву дуллалисса дунияллул халкьуннал дянивсса фольклорданул фестиваллаву ца яла хъуннамур. Фестивальданул тяхъашивуртту най дусса дур Сазхаломбатта, Ракеве, Тёкёль шагьрурдай.
«Саммерфест – 2016» фестивальданий Аьрасат ва Да­гъус­ттан ккаккан буллай дур цачIунхьу ансамбль «Дагъусттан», цивунгу бухлахисса Лаващиял райондалиясса «Леваши» ва ДР-лул Культуралул министерствалул РДНТ-лул «Эхо гор» (ш. Хасавюрт) муниципал ансамбльлал гьурттучитал, мукунна Киров шагьрулиясса «Искорка» ансамбль. Вай коллективру гьуртту хьуну бур ва фестиваль тIитIлай Сазхаломбатта шагьрулий хьусса гала-концертрай. Микку мукунма гьуртту хьуну бур Сербиянавасса, Колумбиянавасса, Испаннавасса, Аргентиннавасса, Коста-Рикилиясса, Уругвайнавасса, Тайланднавасса, Мексиканавасса, Турциянавасса, Франциянавасса, УзбакIисттаннавасса, Италиянавасса, Палестиннавасса ва цаймигу билаятирттаясса коллективру.
Ва фестивальданийн «Да­гъусттан» ансамбльданул хIадур дурну дур хъуннасса ва дахханасса творчествалул программа, цивунгу духлахисса Дагъусттаннал халкьуннал къавтIавуртту.
Концертрай гьуртту хьуну бур ДР-лул культуралул министр Зарема Буттаевагу.
— Хъуннасса агьамшиву ду­ссар жура Европанал дязаннив жула аслийсса культура ккаккан дуллалаврил. Европанал халкь чIяву миллатру бусса Аьрасатнал, Дагъусттаннал аьдатирттащал, багьу-бизулущал кIул буллай, жура цIакь дуллалиссару жула халкьуннал дянивсса дусшиву. КIицI лаган ччива укун­сса, культурардал дянивсса, диалограйн бувну жула билаятрая, жулла республикалия чIявусса инсантуран кIул хъанахъишиву. Жула коллективирттал хIакьину ккаккан дуллай бур жула билаятрал рувхIанийсса аваданшиву, мунил щихакIуй къалархьхьусса халкьуннал искусство ва культура, — тIий бур ва.
Республикалия Венгриянавун лавгсса творчествалул делегациялул Сазхаломбатта шагьрулул культуралул центрданий дурну дур Дагъусттаннал этнокультуралул выставкагу.
Венгриянал оьрчIан жула артистурал бувну бур мастер-классру, миллатирттал къав­тIавуртту, музыкалул инструментру бищун лахьхьин буллай, халкьуннал культуралущал ми кIул буллай.