Хъусрахь
ОьрчIру буруччаврил кьинилун хас дурсса мероприятияртту кIицI ларгунни Ккуллал райондалул щархъаву. Ва кьини ххаллилсса байран дунни Тахакьа АхIмадовлул цIанийсса Хъусращиял школалий.
Байран наниссаксса хIаллай дуклаки оьрчIругу, учительталгу хIала бувххун къавтIий, балайрду тIий, конкурсру, тIуркIурду буллай мажлис тяхъа буккан бунни. Байран лавайсса даражалий тIайла дуккан хъунмасса хIарачат бунни школалул директор ЩайхахIмад АхIмадовлул.
Ванал бувсунни ОьрчIру буруччаврил кьинилул тарихрая. КIицI лавгунни ва кьинилул цал ялагу жунма дакIнин бутлатишиву оьрчIахлусса жаваблувшиннарая. Гьарицагу оьрчI ниттил ва буттал дянив хъунма хьун аьркиншиврия, оьрчIан гьарицагу лахIзалий нитти-буттал ччаву асар хъанан аьркиншиврия. ЧIа увкунни оьрчIан тяхъасса оьрчIшиву, талихI-тирххандарайсса оьрму, цIуллушиву.
ОьрчIру барча буллалисса ихтилатру бунни учительтуралгу.
ЧIяв
ОьрчIру буруччаврил кьинилун хас дурсса «Дети наше будущее» тIисса мероприятие хьунни ЧIяйннал шяраваллил культуралул къатравугу. Ванил сиптачи хьунни Культуралул къатлул хъунмур СалихIат Алхасова.
Гьарица шинах оьрчIал байран лавайсса даражалий тIайла дуккан хъунмасса захIмат бишай СалихIат Алхасовал. Ва ххуллухьсса байрандалул мажлис тIитIлай, оьрчIру барча буллалисса ихтилатгу бунни ванил цилва.
– ОьрчIру – жула аваданшивур. Вайннал цIанийру жува зузиссагу, заназиссагу. Жува буржлувссару жула оьрчIал яла агьаммур ихтияр – талихIсса оьрчIшиву дуруччин ва дузал дан. ОьрчIрув, зу хъуни буллай нитти-буттал бихьлахьисса захIмат дузрайн букканнав, зул оьрчIшиву тяхъасса, буруккин бакъасса хьуннав, зул ялувсса ссавгу чаннанура личIаннав! КъадучIаннав тачIав оьрчIру буручлансса кьини, – увкунни ванил.
Хъирив, дуклаки оьрчIал увкунни балайрду, бувккунни шеърирду, ккаккан дунни къавтIавуртту. Бунни оьрчIру таза буккансса конкурсру ва тIуркIурду.
ОьрчIру барча бунни ва байрандалий ххуйсса гьурттушинна дунни ЧIяйннал школалул байбихьулул классирттал учительница Аьйшат Валиевал.
Имара Саидова
