Дагъусттаннал ХIукуматрал председательнал буржру биттур буллалисса МахIаммад Рамазанов ОьрчIру буруччаврил кьини ивунни Избербаш шагьрулийсса 7-мур ОьрчIал къатлувун.

Ва идаралул зузалтрал ва оьрчIал хьхьичI махъ лахълай, ванал кIицI лавгунни оьрмулул хъуниминнан ва кьини хьхьичIра-хьхьичI хъанахъишиву оьрчIал бучIантIимунил ялувсса жаваблувшинна дакIнин дутлатисса кьинину, урчIва оьрчIал ппу хIисаврай цанма ва кIану ххуйну бувчIлачIишиву, оьрчIру буруччаву обществалул ва билаятрал гьарца кьинисса масъалану, мурадну бикIан аьркиншиву.

ОьрчIан ванал чIа увкунни дуккавривугу, спортравугу хьхьичIуннайшивуртту. Педагогтурахь ва махъсса цинявппагу зузалтрахь барчаллагь увкунни дуллалисса даврихлу.
Аьрасатнал Федерациялул Следственный комитетрал Дагъусттаннайсса Следственный управлениялул каялувчи Александр Суприннущал ххал дунни оьрчIру ялапар хъанахъи­сса шартIру, творчествалул дуссукъатта, пищеблок, оьрчIан дуллалисса дукра. Премьер-министрнал тавакъю бунни оьрчIал цIуллу-сагъшиврул ялув бацIан, вайннан шайссаксса чIярусса мюнпатсса дукра дуллан ва шайссаксса чанну – качар ва нацIушивуртту.
Идаралун пишкаш дунни кондиционерду, гьарцагу оьрчIан – бахшиш.

Бадрижамал Аьлиева