Итни кьини МахIачкъалалив шадлугърал даражалий тIивтIунни ниттил мазру лахьхьаврил гъинттулсса курсру. Дагъусттаннал бакIчинал грант дурххусса хъуннасса агьамшиву дусса ва проектрал даву дайдирхьунни июнь зурул 1-нний МахIачкъалаллал А.Аджиевлул цIанийсса 29-мур школалий. Ниттил мазру ва Дагъусттаннал халкьуннал культура ядаврил фондрал пикри бунни ниттил маз лахьхьаврил гъинттулсса курсру шикку зузи бан.
Ва кьини школалул актовый залданувун бавтIун бия оьрчIру ва нину-ппу, педагогтал ва хъамал. Ва бусравсса даврил дайдихьу ОьрчIру буруччаврил кьинилийн тIайла дацIаврилгу цила тIилисин бухьунссар. ТIуркIулул, дялахърулул кьяйдалий лахьлантIий бур чIава дагъусттанлувтал цала ниттил маз. КIул хъанан тIий бур мунил караматшиву, аваданшиву. Гъинтнил каникуллай ниттил маз лахьхьин занантIиссар лак, ярусса, дарги, къумукь ва лазги. Проект дузрайн дуккан дан хъуннасса хIадуршинна дан багьунни ваниха зузиминнан. Луглан багьунни ххювагу группалунсса оьрчIах, хIадур буллан багьунни учительтал.
Учительтал, нину-ппу ва оьрчIру барча буллалисса ихтилат бунни 29-мур школалул директор МахIаммад Халитовлул. Ванал кIицI лавгунни школа хIадурну бушиву оьрчIру кьамул бан, щаллу дурну душиву дарсирдан аьркинсса шартIру.
– Ххариссару укун агьамсса проект жула школалий бартдигьлай тIий,– увкунни ванал. Проектрал каялувчи Шамсият Султанбаговал барчаллагь увкунни нитти-буттахь цала маз ябан аьркиншиву бувчIлачIаврихлу. Ванил бувсунни дарсру мюнпатсса ва оьрчIавун гъира бутансса, бизар дакъасса дикIантIишиву. Фондрал президент Аьли Камаловлул чIа увкунни оьрчIан тIайлабацIу.
– Ттун чIалай бур зу зула кулпатирттаву ниттил маз бухкъалаган нигьачIи бушиву. Мукун бикIангу аьркинссар. Му тIайласса ццахри. ХIакьину жува цалчинсса ша лавсъссар жула мазру ххассал баврил цIаний. Дагъусттаннал чIявуми мазру бухлагансса нигьачIаву дур. Жула буржри му ялун нанисса никирттан ябан, – увкунни ванал.
Лакку маз лахьхьаврил центрданул хъунмур ПатIимат Аьлиевал кIицI лавгунни маз буруччаву школалийсса дарсирдая ягу курсирдая дайкъадишайшиву, му гьарица кулпатраву дайдишин аьркинсса даву душиву. – Нину-ппу оьрчIащал цала мазрай гъалгъа тIутIиссакссар мазгу, миллатгу яшайсса, – увкунни ванил.
ОьрчIру барча буллалисса ва тIайлабацIу чIа тIисса ихтилатру бунни циняв педагогтурал. Ва кьини цила дикIайкунсса байран хьунни. Цинявппа кунная кув рязину ливчIунни. ЧIалай бия оьрчIаву гъира бушиву. Мури курсирдая мюнпат шаврил ца хIуччагу.
Гъинтнил шанмагу зуруй оьрчIан авадансса, жура-журасса тIуркIурдащалсса программа дикIантIиссар. Ва дахьра дайдихьур.
ТIайлабацIу хьуннав.
Андриана Аьбдуллаева
