Бабаюртуллал райондалийсса 1-мур Львовское тIисса шяраву, балугърал хозяйство дусса кIанттурдай, хьунни «Мирное небо – счастливое детство» цIанилусса ОьрчIру буруччаврил кьинилун хас дурсса байран. Аьдатравун дагьсса, хасъсса аьралий операциялул гьурттучитурал оьрчIансса байрандалул сакиншинначитал хьунни «Нияро» ООО-лул каялувчитал ва «Солидарность и Свобода» жяматийсса организациялул вакилтал («хуршиловцы»).

Шадлугърал мажлис тIитIлай, оьрчIругу, хъунимигу байрандалущал барча бунни «Солидарность и Свобода» советрал хъунаманал хъиривмур, цIа дурксса жяматийсса ишккакку, полициялул майор Ума Аскерхановал.
– ХIакьину жува кIицI лаглай буру ца яла чаннамур ва тIааьнмур байран. Дунияллул оьрчIан тирххандарансса ва хъиншивурттансса байран. Жула билаятрал оьрчIаннив ва хъанай дур ххишаласса агьамшиву ва мяъна-мурад бусса кьини, цанчирча жува буру хIакьину хьхьичI ххуттай бавцIуну Ватан дуручлачиминнал, жула ялувсса чаннасса ссавнил, жула тяхъасса оьрчIшиврул цIаний талатиминнал кулпатирттавасса. Жува жула вирттавран цIакьсса къинттану хьун аьркинссару. Тай цала бурж биттур буллай буссаксса, куннал кув бувгьуну бикIан аьркинссару, – увкунни ванил ва дурккунни оьрчIан байран дан цала бакIрайн лавсъсса «хъинсса ссихIирчи», Балугърал хозяйствалул хъунама Сулайман АхIмадовлун хас дурну цила чирчусса назму. Хъирив ихтилат бувсса «Нияро» ООО-лул генеральный директор Сулайман Жанакаевичлул кIицI лавгунни хасъсса аьралий операциялул гьурттучитурал оьрчIру цала яла чIа тIими ва яла хIурмат буми хъамал бушиву, бувсунни 1-мур Львовское шярава хасъсса ­аьралий операциялийн 38 къучагъ лавгшиву. КIицI лаган, цинявппа гьурттучитуралссагу, чувшиврий жанну дуллуминналссагу суратру ларчIун дия байрандалул мажлис ­нанисса кIанттурдай.
Концертрал программа дайдирхьунни Ватандалухсса ччаврил лишанну ккаллисса «Матушка Земля» тIисса балайлия. ОьрчIал увкунни цаймигу ватандалухасса балайрду, щаллу дунни къавтIавуртту, артистътурал кунма, усттарну ккаккан бунни дяъвилул лахIзарду. Концертрал программа хъиннура чIюлу дунни цимилагу хасъсса аьралий операциялийн гуманитар кумагращал лавгсса жула волонтер Садаят МахIаммадовал, Дагъусттаннал лайкь хьусса артистка СалихIат Валиевал ва Барият Акаевал балайрдал.
Щалагу мероприятие наниссаксса хIаллай оьрчIругу, хъунимигу тяхъа-таза буккан буллай бия ва кьини магьрал персонажру хьусса «Солидарность и Свобода» советрал вакилтал.

Хьунни оьрчIал дянив хIазсса бяст-ччаллугу. Мюнпатсса бия « духтур Айболитнал» маслихIатругу. Дялахърулул программа къуртал хьуну махъ Сулайман АхIмадовлул цала хозяйствагу ккаккан дурну, шиккува хъуни бувсса балугърал тIин-тIааьнгу ххал бан, цинявппа щябивтунни авадансса ссупралух.
КIицI лаган, ацIра шин хьуну дур Сулайман АхIмадовлул балугъру хъуни байсса хозяйство тIиртIуну. ООО «Нияро» хъанахъиссар осетралул балугъ лавкьусса бассейннаву хъуни байсса проектрал сиптачи ва му дузрайн дуккан дурми. ХIакьину ва иш бавчусса хозяйство дур учин бюхъанссар. Цинявппагу ва кьинисса байрандалул гьурттучитурал цIания барчаллагь тIий бура Сулайман Жанакаевичлухь, ванал зузалтрахь оьрчIангу, хъуниминнангу дакIний личIансса байрандалухлу. Каши ххи даннав, бюхълай личIаннав.

Андриана Аьбдуллаева