Июньдалул 1-нний Дагъусттаннал бакIчинал буржру биттур буллалисса Федор Щукин ивунни С-М. Оьмаровлул цIанийсса Республикалул перинатальный центрданийн ва Республикалул оьрчIал клиникалул азарханалийн.
Перинатальный центрданий ванал яхши-хаш бунни хIакинтуращал ва цIуну дунияллийн бувксса оьрчIал ниттихъащал. ХIакинтурал ванахь бувсунни ва центр тIивтIушиву 2017-ку шинал, шиккусса отделениярттая, мукунма ва центр ччяни дунияллийн бувксса (недоношенные) оьрчIан ларайсса технологиярттал медициналул кумаг баврил хъар ларсун нанисса бушиву. Ларгсса шинал шикку дунияллийн бувккун бур 5 азарунния ливчусса оьрчIру.
ОьрчIру бувсса хъаннин Федор Щукиннул дунни бахшишру.
Ва кьини ва ивунни Республикалул оьрчIал клиникалул азарханалийнгу.
ДРКБ хъанахъиссар республикалул медициналул хъунисса идарарттавасса ца.
Азарханалул хIаятраву оьрчIан ва вайннал нитти-буттан республикалул цIа дурксса балайчитурал ва къавтIаврил коллективирттал ккаккан дунни концерт.
ОьрчIру барча буллай, Федор Щукиннул лавхъунни вайннал дакI дуллалисса махъ.
– ДакI дарцIуну ура зу, хъингу хьуну, ччаннай бавцIуну, чIал къавхьуну зула шаппай, гъан-маччаминначIан зана хьуншиврий. ЧIа тIий ура зун цIакьсса цIуллу-сагъшиву, дакI тIайласса дустал. Зул оьрмулуву чIяву хьуннав ххарисса ишру, чIаравгу мудан бикIаннав зунмагу, зувагу ххирами.
Жунма, оьрмулул хъуниминнаннив, ва байрандалул дакIнин бутай, цуксса агьамшиву дуссарив жула оьрчIаха аякьа даврилгу, вайннал лагма-ялттусса дуниял, цалла дирхьусса суратирттай кунна, хъинсса ва чаннасса дикIаншиврул буллалисса хIарачатралгу, – увкунни ванал.
Ахирданий барчаллагь увкунни оьрчIал ялув, вай баннингу, бувну цалчинсса гьантрая байбивхьуну, биялсса оьрмулувун бияннингу, буллалисса захIматрахлу.
Бадрижамал Аьлиева
