Дагъусттаннал ХIукуматрал председательнал хъиривчувнал буржру биттур буллалисса Муслим Телякавовлул каялувшиндаралу хьунни цIа дурксса, лайкьсса инсантурал ва тарихийсса иширттал аьпа абад баврил Дагъусттан Республикалул БакIчиначIасса Комиссиялул заседание.
Шикку ххал бивгьунни республикалий ляличIисса ккаккияртту чIалачIи дурсса шама дагъусттанлувнал цIа абад даврил масъала: юстициялул советник ХIажи Мамедбековлул, республикалул халкьуннал шаэр Аьбдулла Дагановлул ва Аьрасатнал Федерациялул лайкь хьусса художник Альберт Хаджаевлул. Шиккува кIицI лаган, Альберт Хаджаевлул цIа дизантIиссар Каспийск шагьрулул оьрчIал художествалул школалун. КIулсса куццуй, ва зий ивкIссар художник-график хIисаврайгу, ванал щаллу бувссар жулла республикалулгу, билаятралгу, чил билаятиртталгу автортурал 200-нния ливчусса луттирду. Комиссиялул члентурал циняв цану чIурду буллунни кIицI лавгсса дагъусттанлувтурал аьпа абад баврихлу.
