Дагъусттаннал ХIукуматрал председательнал буржру биттур буллалисса МахIаммад Рамазановлул каялувшиндаралу хьусса Дагъусттан Республикалул ХIукуматрал заседаниялий ххал бивгьунни 2026 шинал паччахIлугърал хIасиллал аттестация даврил ва цIуллу-сагъшиву цIакь даврил гъинтнил кампаниялийн багьайсса суаллу.
МахIаммад Рамазановлул кIицI лавгунни, жулла республикалий ттигу-шилагу ЧС-рал (чрезвычайная ситуация) режим дунугу, штатралмур режимрай, аьдатсса кьаралданий хIадур хъанай бушиву июньдалул 5-нний дайдирхьуну, августрал 30-ннин лахъи лагантIисса «летняя оздоровительная кампаниялийн».
Ттигъанну хьусса тIабиаьтрал бала-апатIсса иширттайн бувну, ванал тапшур бувунни оьрчIал лагерьдал ялтту цал ххишалану буккан, дукъарну лирчIсса давуртту духьурчан, дуван. Яла-яларив, ххишаласса къулагъас дуван миккусса санитар-эпидемиологиялул кьараллах ва оьрчIацIух зун нанисса пишакартурах (педагогикалул ва медициналул зузалтрах, вожатыйтурах ва м.ц.).
Къулагъасралун лавсми масъаларттавух бур лагерьдайнсса путевкардайн багьаймургу. Вай дуллалисса чIумал чара бакъа ва хьхьичIва-хьхьичI хIисаврайн ласлай бур хасъсса аьралий операциялул гьурттучитуралми ва ихтиярду дуруччай органнал зузалтралми кулпатру, мукунма захIматсса иширавун багьсса кулпатирттавусса оьрчIру, вайннувух щин ххярххун къатта-къушлин зараллу хьумигу. Мукунма цIуллу-сагъшиврул ссуссукьусса оьрчIругу.
Регион вай иширттайн хIадуршивриясса доклад буллай, республикалул кIулшиву дулаврил ва элмулул министрнал буржру биттур буллалисса ЯхIия Бучаевлул бувсунни республикалий ва гъинттул 46 азарунния ливчусса оьрчIру бигьалагантIий бушиву, республикалул бюджетраву вай иширттан ккаккан бувну бушиву 429, 48 млн къуруширттал, зузи бувантIишиву 373 лагерь, вайннува 25 цIуну бувсса школалий ва 95 гьануцIакул бакьин бувсса школалий. Шагьрулул кьатIувсса «Солнечный берег», «Орленок» ва «Юность» тIими лагерьдай буминнуцIун бувну бур цIусса корпусру, ца сменалий аьмну 300 оьрчI ххишалану игьалаганшиврул.
Гьаз бунни оьрчIансса дуки-хIачIиялул даражалийн багьаймур масъалагу. МахIаммад Рамазановлул тапшур бунни ва кIанттухсса бургаву ларай дуван, пальмалул аьгъушиву думур ишла даврий къадагъа дишин, шайссаксса чIярусса ишла дуван жучIара ххяххан дурмур ва ххал буван пищеблокру.
Гъинттулсса лагерьдансса дуки-хIачIиялул анализ дуллай, Роспотребнадзорданул Дагъусттаннайсса управлениялул каялувчи Залимхан Оьмариевлул бувсунни 59 поставщик ва 4 оператор ушиву. Баян бунни административ танмихIру бувми поставщиктал, хаснурив фальсификатсса, къалпсса продукция диян дуллай биривми, гъан хьун къабитантIишиву. Бувсунни оьрчIансса дуки-хIачIия диян дуллантIиминнаясса тIалавшиннардаягу.
Гихунмайсса ихтилатру хьунни ГИА дуллалисса чIумалсса тIайлашиврийн ва марцIшиврийн, мюхчаншиврийн, экзаменну дуллалиминнал цIуллу-сагъшиврул хIалданул ялув бацIаврийн багьайсса.
