Ххувшаврил байрандалул кьини Москавлив, Новодевичье хIатталлив, аьдатравун багьсса куццуй, гьашинугу бавтIунни жула вирттал – кIийла Совет Союзрал Виричу АхIмад-Хан Султан ва цIанихсса парашютист Наби Аминтаев дакIнин бичин, вайннал гьаттардицI тIутIив дишин.
БавтIминнавух бия «Дагестан» МЦК-лул, Аьрасатнал президентначIасса Дагъусттаннал вакилханалул, М.Илиясовал цIанийсса «Дараччи» ихIсандалул фондрал вакилтал. ГьаттардицI тIутIив дирхьуну махъ, кьулгьу-алхIамгу бувккуну, вирттал дакIнин бичлачисса ихтилатру бунни «Дагестан» Москавуллал культуралул центрданул президент, техникалул элмурдал доктор, профессор Арсен ХIусайновлул, Центрданул вице-президент, медициналул элмурдал доктор, профессор Астемир Шайхаьлиевлул, М.Илиясовал цIанийсса ихIсандалул фондрал президент Гульшан Хасаевал ва м.ц.
Арсен ХIусайновлул бувсунни миллатрал цIа бюхттул дурсса кIиягу виричунал къучагъшивурттая ва гьунардая. КIицI лавгунни шамилчингу Совет Союзрал Виричунал цIа дулун ккаккан увну ивкIсса АхIмад-Хан Султангу, мукьийла парашютрай ххяххаврил дунияллул рекорд бивхьусса парашютрал спортрал мастер Наби Аминтаевгу ялун нанисса никиран чувшиврул ва яхIирал эбратну хьун аьркиншиву. Астемир Шайхаьлиевлул байбивхьунни цала ихтилат «Безумству храбрых поем мы песню» тIисса М.Горькийл мукъурттийну. Вай махъру жула вирттаврацIун хъинну бакьлакьисса бур.
– Инсан дяъвилийн виричу хьунна тIий къалагайссар. Га цанна дан аьркинмурди дуллан икIайсса. Ярославль шагьрулул ялув гьава буллалиний, АхIмад-Ханнунгу пикри къабивкIссар циняв патроннугу духларгун цала жами немецнал мессерданийн щун бан багьантIишиву. Иш багьний чувшиву дурссар. Жула оьрчIан, оьрчIал оьрчIан жула вирттаврая кIулну бикIан аьркинссар. Миннал чувшиврул эбратрай хъуна хьуссара на. Мукун тарбия увнав на буттал. Нагу хIарачат буллай ура ттулами оьрчIру мукун тарбия бан. Ва жула аьдат дяличIан къариртун гихуннайгу дачин дан аьркинссар вайннал, – увкунни Астемир Шайхаьлиевлул. Ванал увкумур тасттикь бунни арснал Оьмардул бюххансса ихтилатрал. «Fight Nights» компаниялул президент Камил ХIажиевлул барчаллагь увкунни ва ххаллилсса аьдат дайдирхьунахьгу, ягу дурну, гихуннай дачин дурнахьгу. Ванал оьвчаву дунни ва давривун жагьилтал ххишалану кIункIу бан. Гульшан Хасаевал бувсунни цуппа цалчин хьушиву Новодевичье хIатталлив ва рязину бушиву ва ххаллилсса мероприятиялий гьуртту хьун бюхъаврия. Ихтилатру бунни Медициналул зузалтрал ассоциациялул каялувчи, психологиялул элмурдал кандидат Гулизар Башанаевал, жяматийсса ишккакку Шамхал Ильдаровлул, «Дагестан» МЦК-лул ва «Дараччи» фондрал вакилтурал. Ххадижат Цаххаевал бувккунни АхIмад-Хан Султаннун хас бувну цила чивчусса шеъри. Ватандалухасса, чувшиврухасса шеърирду бувккунни Москавуллал школалул дуклаки оьрчI Саэд Батталовлулгу.
Арсен ХIусайновлул барчаллагь увкунни вирттаврал гьаттардицI тIутIив дишин бувкIсса цинявннахь. Гьашину 200-ннийн бивсса инсантал гьуртту хьунни шикку.
ХьхьичIмур кьини, май зурул 8-нний, Мытищилийсса аьралий хIатталлив (Ватан дуруччултрал пантеон) тIутIив дирхьуссар Аьрасатнал Виричу МахIаммад Исбакиевлул гьаттацIгу. Мура кьини бивссар жула ватанлувтал бувччусса Троекуровский хIатталливгу.
ДакIнин бутан, Новодевичьелий, Троекуровский ва аьралий хIатталлай жула вирттаврал гьаттардицI тIутIив дишин лагайсса аьдатрал сакиншинначи хъанахъиссар Москавуллал культуралул центр «Дагестан».
Андриана Аьбдуллаева
