Буттал кIанттул цIанийсса Хъунмасса дяъвилул гьурттучи, Читту­рдал шяравасса ХIасан-ХIусайннул арс ХIусайн Кьурбанов увну ур майрал 7-нний. Ххувшаврил байрандалуцIун ва увсса кьинилуцIун бавхIуну, цала буттан, фронтовикнан, хас бувсса «Зунттал шяравусса гьайкал» тIисса шеъри кказитрай бивщуну ччива тIий, увкIунни жул редакциялийн журналист, шаэр Кьурбан Кьурбанов. Ва шеъри цуппагу «Ттущалва навалусса щугълурду» тIисса, чIал къавхьуну буккантIисса Кьурбаннул шеърирдал жужравасса ца бур.

Фронтовикнал арснан Кьурбаннун ппу ур дяъвилул захIматшивурттугу дурхIусса, зана хьувкун, дяъвилия махъсса шиннардийсса бигьа бакъасса къайгъурдал хъаргу лахъан багьсса къучагъ.

– Буттал кIанттул цIанийсса Хъунмасса дяъвилий жанну дуллусса ва ятIа-тIар бакъа бакъа хьусса Читтурдал къучагътурал аьпалун 1963-ку шинал шяраву дацIан дурсса гьайкал хьуссар Дагъусттаннай цалчин дацIан дурсса мукуннасса гьайкалдавасса цану. Ва дацIан дурссар ттул буттал сипталий ва хIарачатрай, шяраваллил жяматгу хIала бувххун. Ппу цува гьуртту хьуссар техникалул давурттавухгу, гьайкалданул проектру щаллу дуллай, мунийнсса суратру ххал дуллай, – буслай ур Кьурбан.
Гьайкалдануха зузисса давурттавун ХIусайннул кIункIу увну ур цала ссурахъу, Гъумучиял школалул директор Ибрагьим Чалабовгу, цала арс, кIицI лавгсса шеърилул автор, Кьурбангу. Шяраву дяъвилий жанну дуллуминнан гьайкал дацIан даву цала буттал граждан чувшивурттавасса цану ккалли дуллай ур Кьурбан. Дяъвилия махъсса шиннардий ХIусайннул цаймигу чувшивуртту дурну дур,­ ми­ннуя «Буттал-фронтовикнал аманат бувсса билаят» тIисса цала луттираву бусан дакIний ур автор. Ва лугу буттан 110 шин шаврин хасну, 2028-ку шинал майрал 7-нний итабакьинсса пикрилий ур. Укунсса лу итабакьаву ванан цала буржну чIалай бур, цанчирча ва ур дяъвилия махъсса шиннардийсса иширттал бара. Лагма-ялттусса чIявуминнавун, гъанчувнавун кунма, ванавунгу гьавас бутлай бивкIун бур буттал дуллалимунил. Ва назмулувугу, Ссунгъур Къушиев ва Даниял Магьдиев дакIнин бичлачисса, «Илчи» кказитрай дуккантIисса макьалалувугу Кьурбаннул дахьва кIицI лавгун бур буттал чувшиву ккаккан дуллалиисса ишру, балжину миннуя чивчуну бикIантIиссар ялув кIицI лавгсса луттираву.

Андриана Аьбдуллаева

Дяъвилий ливтIуминнал цIарду абад дан дирхьусса ­гьайкал

Ттул ниттил ва буттал
кулпатирттава
Ватан ядан, талан
лавгссар арула,
Зана къавхьуну бур
ххюя миннава,
Махъми зана хьуссар
мушакъат хьуну.
Ттун хъинну дакIний бур,
къужрал бусайва,
Жяматгу пикрирдай
цукун бивкIссарив:
ШанмурцIу чагъардах
циняв ялугьлай,
ИвкIусса бавукун,
маоьрду бихьлай.
ЗахIмат буллай хъаннил,
къужрал ва оьрчIал
Аьркинмур дузалгу
дяъвилун дурссар,
БивкIнугу баларду
букIлай бакIрачIан,
Ххувшаву жучIанна
ахиргу дуркIссар.
ЯтIа-тIар бакъасса
чансса къавхьуссар,
Ппухълу бакъа оьрчIру
ятинтал хьуссар,
Ххуллурдайн ялугьлай
нинухъру лирчIссар,
КкурчIай чарттал чIуллайх
мяххи даркьуссар.
ДакIний бур ттун ттаттахь
увкумур буттал,
Дяъви къуртал хьуну
чIунну ларгун махъ,
АцIния арулла шин
хьусса кьини,
Куна: «Ттун дакIнимур
ччива вихь бусан».
«Буттай, – куна ганал,
увккун якьама,
– На ччай ура вилмур
пикригу кIул бан.
Къахъиннив шяраву
ца чару бишин,
Аьрая къабувкIнал
цIарду ­чирчусса,
Ятинтал хьуная бур
чиваркI хъанай,
Гайннан дарсну хьунссар
оьрмулухунсса».
Ттаттал куна: «Арс, му
пикри бур хъинсса,
Так цIуххин аьркинни
жяматрахь жува».
Ттул буттал му пикри
ккурчIав аьч бувна,
Цинявннан му пикри
къулай бивзуна,
Аьркинсса кумагру
буванну куна.
Ппу ия художник щархъай
цIа дурксса,
Чарий талатаврил
суратру дурна,
Микку Ибрагьиннул,
буттал ссурахъуйл,
ЦIалачIиллух цIуцIлай
чIалачIи дурна,
Ганал кумагчину уссияв нагу.
ЦIарду ливтIуминнал,
бакъа хьуминнал,
Дувссилул муххардий
буттал цIурцIусса,
Хьуна ттуща аццух
ва цIарал луххах
Пар-пар тIигу дурну,
дишин хIадур дан,
ЧIалай бия ттун му
ттула бурж бусса.
Ттухь жуятувасса
лакку мазрай махъ,
Буттал вин увкуна
багьлай бур чичин,
Яла цала бувна
бакьин бан кумаг,
Жуща учин ччимур
хьуна гив бишин.
Му хьуна шеърирдал
ттул цалчинсса дарс,
Гайва гай махъру чин
хIадурну ура,
Хас бувну цайминнан
жула шяравсса,
Шаппай зана
бивкIун дяъвилияту,
Жунма цинявннангу
оьрму буллусса.
Минная ура на
чичлай пахрулий,
Ва Ватан виртталну
ядурминная,
Ччаннай жува циняв
бацIангу бувну,
Чувшиврий хIукумат
гьаз дуллай бивкIсса.
На ми цинявннанъя
шеъри хас бувсса,
Та чIумал Читтурав
бивхьусса чарий:
«Абадул абадлий,
оьрчIал оьрчIангу,
ЛичIантIиссар дакIний
зул чанна пикри,
Немец-фашистная
аьзизсса Ватан
Ядуллай харж бувсса
зул жагьил оьрму».
Гай вирттаврал цIарду
дувссилул улттуй
ЧIарах наниминнах
дуссар дуруглай,
Къабюхълай бур ттуща
рахIатну ацIан,
Къачивчуну шеъри
гай вирттавраха.
Виричушиврунгу,
шаэршиврунгу,
КъакIулли бушиву
бивкIу тачIавгу.
Кьурбан Кьурбанов,
1995 шин. ш.Читтур