Майрал 4-мур кьини КIундиннал шяраваллил жяматрал тарихравун дурххунни цIарал кьинину. КIюрххицIун чIумал цIу дагьну, кунницIун кув ларчIун дурсса къатрая цIу цанния цаннийн ласлай, ва кьини шяраву ччурччунни ряхрайра къатри.
Шагьрулия шяравун бувкIукун, буттал, ттаттал къатраву цимивагу кулпат бацIайсса аьдат духьувкун, ряхва кулпат бакъача, цимиягу инсан хъанай ур буттал шяравусса цалла тIювардацIа хьусса.
ЦIу дагьаву цурда хьунни Оьмаевхъал къатраву. Газрал баллон сававну лархъсса цIу, ялун виргъан, му-та дутлай, лещан дуван хIарачат булларчангу, къархьуну дур лещан дуван. Инсаннаяр ххув хьусса цIугу къатравун ххярххун дур, балайрдавун, бусалардавун дагьсса тIаннул ларзурдайнгу рахIму бакъа хъап тIий.
Бала-апатIрал хавар най буна ппив хьуну, шагьрурдай ялапар хъанахъисса кIундими, цIу ларчIсса махIлалий цалла къатри думигу, дакъамигу леххаврий бувкIун бур шяравун МахIачкъалалия, Каспийскалия, Хасаврая ва цаймигу кIанттурдая.
– КIюрххил ссят 6:50 хьуну оьвкуну Гъумукун цIу лещан дувултрайн, хъунма хIал къавхьуну бувкIунни цIу лещан дувай машина. Ччучлачисса къатрачIан машина гъан хьунсса куц дакъану, къума кIичIирттавух цимирагу метралул лахъишиврий шлангру кIункIу дурунни пожарниктурал. ЦIу ларчIсса кIану чIивисса ва бигьасса бакъашиву бувчIуну, кумаграйн оьвкуну, чIаххувсса Лаващиял ва Ахъушиял районнаягу бувкIунни цIу лещан дувай машинартту. Ялагу тIайлабацIу хьунни арх бакъа Хъун-бяр бушиву. Машинарттаву щин къуртал шайхту, бярату буцIин буллай бия. Ххюва къатта щаллуну, ца къатта бачIину ччувччунни. Зарал ванияргу хъунмасса биян бюхъайва. ЦIу, гихуннайгу цайми къатрайн къадиян, лещан дуван хъунмасса захIмат бивхьунни пожарниктурал ва шяраваллил инсантурал. Цинявннанмагу хъунмасса барчаллагь.
ЦIанасса чIумал хасъсса органнал цалла даву дуллай бур, экспертиза тIий, цамур тIий, хьумунил хъирив лаллай. Вай щаллу шайхту, шагьрурдаймигу, шяраваллавумигу бувккун, къатри ччурччусса кIанай дувантIиссар субботник. Шяраваллил депутатътуращал пикри бувантIиссар гихуннай дуванмунил ялув. Къатри ччурччунан паччахIлугърая кумаг багьлагьисса кIану бухьурчан, шяраваллил администрациялул кумаг бувантIиссар дагьаймур тIалав даншиврул аьркинсса документру щаллу буван, – тIий ур КIундиннал шяраваллил администрациялул бакIчи МахIаммад МахIмудов.
– Пожарниктурал ва шяраваллил инсантурал хIарачатрайн бувну лещан дуван бювхъунни цIу. Цалва оьрмурдансса ва цIуллу-сагъшиврунсса нигьачIишиврух къабурувгун, хъунмасса захIмат бивхьунни жагьилтурал, шанна зивулийсса къатрал магъуйнгума лавхъун бия. ЦIарду кIицI къадулланна, цанная бувсун, вама хъамакъаитан. Хъинну хъуннасса даву дунни жагьилтурал, пожарниктал бучIаннингу, вай лавгун махъгу. Къатраву чанна-чанну газрал арулла баллон диркIун дия, вайннува ца-кIира пIякь увкусса хавар бур. Къатрал магъая, чIирттая цIаран лархъсса тахтарду, кIири ларгсса махру кьатI хъанай дия. Пожарниктал лавгун махъгу тикку-шикку цIу лахълай, кIиллай дия, инсантурал, бадрардах дутIлай щин, лещан дунни. Шикку яла агьаммурдив инсантурал я оьрмурдан, я цIуллу-сагъшиврун зарал къашаву дур. Хьхьувай шяраваллил арамтал, жагьилтал ирглий къарал буллай буссия цIу цIунилгу къалахъан. Аьрщарал, тахтардал лув ччукъавччуну ливчIсса бартбисуртту, паммалул шанурду, виргъантру кIиллай, цIу лахълай дуну, лархъмур хъиннура лачIуннин лещан дуллай бия, – тIий ур шагьрулия леххаврий шяравун увкIсса Низами Умаров.
Увкумунил ялунгу ххи буллай, Низамил увкусса махъругу тикрал буллай, махъминнангу дакIнин бутлай, учин: уку-укунсса иширттаща цучIав мурахас увну акъахьувкун, къахьунмур оьрмулуву цал бунугу шайхьувкун, гьарца къушлий чара бакъа дикIан аьркинни цIу лещан дувайсса зат (огнетушитель), оьрмулуву цал аьркин хьунгу, цаллагу къахьунгу.
Аллагьнал арх баннав бала-апатI, хьумуния тIий битаннав.
Бадрижамал Аьлиева
