Ххувшаврил кьинилул хьунийн Лакрал райондалул бакIчи Зураб Куччаев цачIун хьунни «Георгиевская лента» тIисса щалагу Аьрасатнал акциялийн.

Гъумучиял школалул дуклаки оьрчIал бавхIунни муниципалитетрал каялувчинай цIухъахъисса ва лухIисса щару бусса лента. Зураб Куччаевлул барчаллагь увкунни оьрчIахь тарихрал хIурмат бушиврухлу.

«Георгиевская лента – совет солдатнал ва халкьуннал лакъахIайсса гьавасрал, ватандалул ххуллий талай бивкIминнал чувшиврул ва жанну дулуминнал аьпалул лишанни. ДакI ххари хъанай дур ялун нанисса ник ветерантурайн барчаллагьрай, тарихрал хIурмат буну, ватандалул ххуллий жанну дуллуминнал аьпа буручлай хъун хъанай душиврия», – увкунни ванал. Акциялул кабакьу буллалиссар никирттал дянивсса дахIаву цIакь дан, хъун хъанахъисса никираву ватандалухсса ччаву тарбия дуван.

Зулайхат Тахакьаева