Апрельданул 22-нний МахIачкъалалив, Семендердайсса 58-мур школалий, дунни миллатирттал культуралул шагьрулул «Балайлул ва хияллал хъаттирдай» тIисса фестиваль Ва, 2017 шиная тIайла хьуну, гьарца шинал интту дувайсса, аьдатравун дагьсса фестивальли.
ЧIявусса миллатру яхъанахъисса поселокрай хъамаллуран хIадур дурну дикIай авадансса программа: миллатирттал балайрду ва къавтIавуртту, мастер-классру, личIи-личIисса пишардал заллухъруннал, магьирсса канил усттартурал ярмарка, арт-проектру, выставкартту. Унгу-унгунусса байрандалийн багьай хъамал мяйжаннугу.
Фестивальданул бусравсса хъамаллуравух бия шагьрулул КIулшиву дулаврил управлениялул хъунмур Шаганэ Баймурзаева, Дагъусттаннал Чичултрал союзрал хъунаманал хъиривчу Супиян Оьмаров, ХIамзатовлул цIанийсса Национал библиотекалул культуралул программарттал отделданул хъунмур Ольга Аьлиева ва цаймигу.
Фестивальданул дайдихьу дуллалисса махъ лахълай, Шаганэ Баймурзаевал кIицI лавгуна Аьрасатнал Халкьуннал цашиврул шинну баян бувсса ва шиналсса фестивальданулгу чIалачIи буллалишиву агьали, миллатру, культурарду, динну личIи къадуллай, бавкьуну яхъанан ччай бушиву.
КIицI лавгсса школалул директор Шамил Аьлиевлул хъамаллурал делегация миллатирттал майданнайх буккан бувна. Ххуйя лакралмур майдангу. Ва школалий лакку мазрал дарсру дихьлай буссар Цалчинмур ЦIувкIратусса Зина Оьмариева. Ванил мудангу хIарачат бувай лакралмур майданнал цIа-кьини хъун дуван. Оьвчай машгьурсса балайчитурайн, музыкантътурайн.
Шарапи Ажубов цала зюннав гюргутIи бувну ия. Лакрал дукрардал урцIигу авадансса дия: дукьра хIан, аьрайнгьавккури, къячIив, хьхьахьхьари. Хъамаллуралгу, лакралмур ссупралучIа аглан хьуну, лакку дукрардал тIин ххал бувна. Зина Оьмариевал ва вава школалий зузисса цIувкIрадуш Зиттанат ХIусайрамазановал бувсуна хъамаллурал я бавцIуми лакку дукрардал рецептирдая.
«Сайки циняв дагъусттан мазурдий назмурду дурккунни оьрчIал. Ккаккан бунни пьесарду. Оьрус мазрайгу, ниттил мазурдийгу. Нава личIинува ххари хьунна, миллатирттал мазру оьрчIан лахьхьин буваврих школалий къулагъас душиву чIалай. Жу эксурсия бувну циняв кабинетирттавух бувкру. Бия фольклорданул коллективрдугу, халкьуннал байран дия», – тIий ур Супиян Оьмаров, цалва асарду кIибачIлай.
ПатIимат Рамазанова
