Лакрал райондалул бакIчи Зураб Куччаевлул кабинетраву хьунни гъинттулсса лагерьду зунсса школардал директортуращалсса хьунабакьаву. Ваний ххал бивгьунни лагерьдал даву сакин даврийн багьайсса буруккинтту.

Июньдалул 1-нний Лакрал райондалул мукьва школалий зий байбишинтIий бур дяхтта­сса лагерьду: Гъумук – мяйцIала оьрчIансса, Щарав ва Ккурклив – кьуния ххю-ххюя оьрчIансса, ШавкIрав – кьуя оьрчIансса.
«Гъи – гьарцагу оьрчIан агьамсса чIунни. ЦIусса дукк­аврил шин дайдишин хьхьичI оьрчIаща бюхълай бур бигьалаган, цIуллу-сагъшиву цIакь дан, цIу-цIусса дустал лякъин, бюхъурду итххяххан бан», – увкунни Зураб Куччаевлул.

Ванал тIутIимунийн бувну, укунсса мероприятиярттал кабакьу буллай бур каникуллал чIумал оьрчIру итталу бугьан, вайннал чIун мюнпатну гьан дан.
Лагерьду зун тIий бур кьуния цава гьантлий кIюрххил 9.00 ссятрая ахттакьун 15.00 ссят хьуннин.

Лагерьдай дузал дурну ди­кIантIий дур бюхъу-гьунарду итххяххаврин ва бигьалагаврин къулайсса шартIру. Программалуву бикIантIий бур марцIсса гьавалийсса спортрал тIуркIурду, творчествалул ду­ссухалу, буттал улча лахьхьинсса экскурсияртту ва бялахъансса мероприятияртту. Хаснура къулагъас дикIантIий дур санитар кьараллу дуруччаврих ва дуклаки оьрчIал мюхчаншиврул ялув бацIаврих.
Гъинттулсса лагерьду сакин баву хъанай бур райондалул администрациялул оьрчIан ва кулпатирттан кабакьу буллалисса даврил ца бутIа.

Зулайхат Тахакьаева