Апрельданул 26-нний Албаниянал Тирана шагьрулий къуртал хьунни лачIун буккаврил Европанал чемпионат. Муний Дагъусттаннал лачIунбуккултрал дурххунни 6 мусил, 1 арцул ва 2 чарвитул медальлу.
Дунияллул лачIун буккаврил чаннацIуку Аьбдурашид Сяъдуллаевлул цIакь дунни цалла цIа, Европанал чемпионатрал ряххилчинмур мусил медаль дурххуну.
КIийла олимпий чемпион бакIрай ххув хьунни Австриянал лачIунукку Бенджемин Грейльлуяр. Четвертфиналданий «Оьруснал танк» ххув хьунни Молдавиянал спортсмен Раду Лефтердуяр. Полуфиналданий ванал ух унни Болгариянал лачIунукку АхIмад Магомаев. Финалданий жула цIа дурксса лачIунукку ххув хьунни Словакиянахлу уклай ивкIсса Батырбек Цакуловлуяр 14:3 счетрай.
Турнирданул махъра-махъмур кьини Аьрасатнал лачIунбуккултрал дурххунни ялагу цаппара мусил ва чарвитул медальлу. Турнирданул мусил медальданун лайкь хьунни Хасавюртлиясса Заур Угуев (61 кило).
Финалданийн ияннин ва ххув хьунни Беларусьнал ва Армениянал лачIунбуккултраяр. Финалданий ванал ух унни Албаниянал цачIундур командалухлу уклай ивкIсса жула ватанлув Залимхан Абакаров 4:0 счетрай. Заур Угуевлул ва кIилчинмур мусил медальли Европанал чемпионатирттай ларсъсса.
Мусил медаль ларсунни мукунна Башир МахIаммадовлулгу (65 кило), финалданий ва ххув хьунни Албаниянахлу уклай ивкIсса аьрасатлув Ислам Дудаевлуяр 10: 0 счетрай.
Европанал чемпионатрал кIилчинмур мусил медаль дурххунни Давид Баевлул, финалданий Молдавиянал лачIунукку Александр Гайдардуяр ххув хьуну.
Мусил медаль дурххунни АхIмад Усмановлулгу (79 кило). Ва ххув хьунни Беларусьнал цачIундур командалухлу уклай ивкIсса жула ватанлув МахIаммадхIабиб КьадимахIаммадовлуяр 4:2 счетрай.
Цуксса хIайпнугу, цала мурадрайн иян къабювхъунни Муса Мехтихановлуща (57 кило). Финалданий ва ух хьунни Азирбижаннахлу уклай ивкIсса Ислам Баразгановлуяр. Мусал дурххунни арцул медаль.
Дунияллул ва Европанал чемпионатирттал призер Тимур Бижоев (74 кило) финалданийн къаивунни. Ва четвертфиналданий ух хьунни Словакиянал цачIундур командалухлу уклай ивкIсса Таймураз Салказановлуяр. Чарвитул медальданул цIанийсса лачIунбуккавриву жула спортсменнащал ччалли увккунни Венгриянал цачIундур командалухлу уклай ивкIсса дагъусттанлув Мурад КьурамахIаммадов. Бижоев ванаяр ххув хьунни 1:1 счетрай, ванал муттаэ Мурадлуща ца балл зевххуну бур лачIун уккаву хьхьара даврихлу.
92 килорал категориялий Дагъусттаннал лачIунукку Аманулла ХIажимахIаммадовлулгу ларсун дур чарвитул медаль. Амануллан чансса манзил ливчIун бия финалданийн уккан, амма полуфиналданий ва ух хьунни Болгариянал командалухлу уклай ивкIсса аьрасатлув АхIмад Батаевлуяр.
Чарвитул медальданул цIаний ХIажимахIаммадов лачIун увккунни Турциянал Фатих Алтунбашлущал, жула лачIунукку муттаэнаяр ххув хьунни 7: 4 счетрай.
Мусил медальданул цIанийсса лачIун уккавриву жула Ибрагьим Кьадиевлул бух бувну бур Албаниянал, Турциянал ва Гуржиял муттаэтал. Финалданий ва ххув хьуну ур Азирбижаннахлу уклай ивкIсса аьрасатлув Арсен Жиоевлуяр.
Греко-Румуллал зумунусса лачIун буккавриву Аьрасатнал цачIундур командалува ххув хьуну бур Эмир Сефершаев ва Сергей Емелин, кIилчинмур кIану бувгьуну бур Адлет Тюлубаевлул, шамилчинмур – Артур Саргосяннул.
Душру-хъаннил дянив лачIун буккавриву чарвитул медальданун лайкь хьуну бур Амина Танделова ва Алина Касабиева, чарвитул медальлу ларсун дур Елизавета Смирновал, Наталья Малышевал, Светлана Липатовал ва Кристина Братчиковал.
Европанал чемпионатрай илкинну, греко-римуллал зумунусса ва хъаннил дянивсса лачIунбуккаврий Аьрасатнал цачIундур командалул дурххун дур 8 мусил, 4 арцул ва 7 чарвитул медальлу.
ХI. Аьдилов
