МахIачкъалалив, Уммупазил Муртузялиевал цIанийсса Социал адаптациялул ва профориентациялул республикалул центрданий, «Дагъусттаннал культура ва ­аьдатру» тIисса фестиваль хьунни. Ва цурдагу хас дурну дия Аьрасатнал Халкьуннал цашиврул шинан.

Фестивальданул сиптачи ва сакиншинначи бия центрданул директорнал хъиривмур ХIабибат Шахмилова. Ванил кумагчиталнугу бия лавайми классирттаву дарсру дихьлахьисса педагогтал.
Байрандалул гьанумур мурад бия дуклаки оьрчIан ­Дагъусттаннал аьдатру, лаххия, гьаннайсса, фольклор ва культура хъама къаританшиврул миннуя бусаву ва ккаккан дуваву. ХIатта, хъатIул аьдатругума дия программалуву.
Педагогтал ва дуклаки оьрчIру сайки циняв миллатирттал лаххиярдаву бия. Балайрду, къавтIавуртту, миллатирттал нахIу-нацIусса дукия – гьарзат унгу-унгунусса байран бавтIцириннан пишкаш дуван кьасттирайсса.

БавтIциригу чIявуя. Цинявппагу байрандалущал барча бувна КIулшиву дулаврил ва элмулул министерствалул вакил Мисиду ХIажиевал. Центрданул каялувчи Амирхан Амирхановлул кIицI лавгуна, Дагъусттаннал авадансса культура ва буттахъал аьдатру ирсирай дирсса рувхIанийсса ххазина хIисаврай ябуваврицIун, чара бакъа ялун нанисса никирангу ми дуруччаву жула агьаммур буржну хъанахъишиву.
«Миллатирттал культура ва аьдатру гьанулун ларсун тарбия буллан багьлай бур дуклаки оьрчIру. Фольклорданун, культуралун хасъсса укунсса байраннугу чIяву миллатир­ттал оьрчIру дуклакисса центрданий дуллалаву – ва хъинну ххуйсса ва чара бакъа дуван багьлагьисса давур, жунма жула оьрчIру миллатирттал мазурдия, тарихрая, культуралия, ппухълуннал аьдатирттая арх буцан битан къабучIиссар», – увкунни ванал.
Культуралул программа ягин дурна Дагъустта­ннал халкьуннал артистка ­Луиза Шахдиловал. Хъамаллурал ванил балайрду хъатру ришлай кьамул бувна. Дуклаки оьрчIал ва байран хIадур дурсса педагогтурал ккакан дурна хьхьичIарасса къавтIавуртту, ниттил мазурдий бувккуна шеърирду, ккаккан дурна аьдатирттая бусласисса инсценировкартту.
Гьаксса ххуйну ва лахъсса даражалий хIадур дурну дия сакиншинначитурал шадлугъ, бавтIцириннан, хаснува оьрчIан цанна дакIний личIансса, ххуйсса асардал видурцIусса. Гьай-гьай, миллатирттал дянивсса дусшивугу яргну ккаккан дуллалисса щадлугъ дия.

Миллатирттал дукия, лаххия, тIахIунтту, бартбисуртту ва цаймигу хъус дирхьусса майданнаву лакралмунил даража лахъсса бия. Вагу центрданий чIявусса педагогтал лак бухьувкун, вайннал хIарачат бушиву чIалай бия. КIицI лаганна центрданул каялувчи Амирхан Амирханов ва байран ххуйсса даражалий тIайла дуккан хIарачат бувсса Шахмилова ХIабибатгу лак бушиву. Коллективраву хасну жул буттал шяравасса, Цалчинмур ЦIувкIратусса педагогталгу тамансса бушиву. На вайннахьхьун махъ булав цахъис махъату щалва коллектиращал хьунабавкьуну, центрданул даврия балжину бусан «Илчилул» буккултрахьгу.
ДукIу ва центрданул 60 шинал юбилей кIицI ларгу­нни. Ва цIуллу-сагъшиврул нукьсансса оьрчIан кIулшивурттугу, тарбиягу дуллалисса, захIматрал ххуллийнгу хIадур буллалисса кIанур. Шикку зузимигу оьрчIай дакI цIий ва аякьалий зузисса бур.
«Центрданий, мяйжаннугу, оьрчIал тарбиялух, миллатирттал культура ва аьдатру ххирану тарбия баврих, патриот асарду вайннаву цIакь баврих хъуннасса къулагъас дуссар. Укун­сса журалул мероприятиярттугу ччя-ччяни дувайссар», – увкунни Мадина СантIуевал. Жугу хIадурссару вайннуя буслан.

ПатIимат Рамазанова