Вай гьантрай МахIачкъалалив, Автомобильно-дорожный колледжраву, хьунни Аьрасатнаву баян бувсса Халкьуннал цашиврул шинан хас дурсса «Наша сила в единстве, богатство – в многообразии» тIисса фестиваль.
Ванил бусравсса хъамаллуравух бия ДР-лул Транспортрал ва ххуллул хозяйствалул министерствалул информациялул ва аналитикалул отделданул хъунмур Зарема Кишиева, Кутузовлул ордендалул бригадалул 22-мур гвардиялул штабрал начальникнал бигарду чIумуйну биттур буллалисса полковник Александр Смирнов, ХIайдарбаг ХIайдарбаговлул цIанийсса Олимпий резерврал спортшколалул директор Шяъбан ХIайдарбагов.
Фестиваль дайдирхьунни Аьрасатнал ва Дагъусттаннал гимнру учаврийну. Колледжрал хIаятраву тIивтIуну бия Дагъусттаннал миллатирттал культура, багьу-бизу, аьдатру ккаккан дуллалисса цаннияр ца ххаллилсса майданну.
Шиккун бувкIсса хъамаллурал хьхьичI тIивтIуну бия дукьрахIанттия тIайла хьуну, жалиндалул бакъухърайн бияннинсса личIи-личIисса аслийсса миллатирттал дукрарду дусса, авадансса ссупрарду.
Цивппа майданнугу, художествалул программарттугу хIадур дурну дия колледжрал преподавательтурал ва студентътурал.
Фестиваль дайдихьлай, гьурттучитал барча бувна Автомобильно-дорожный колледжрал завуч Мариян Мухтаровал.
– Укунсса мероприятиярттай жагьилсса ник миллатирттал культуралущал кIул даву дакъассагу, куннал куннащалсса дусшиврийсса арардугу цIакь хъанахъиссар, – увкунни ванил.
– ДакI ххари хъанай дур махъсса ппурттуву Дагъусттаннай миллатирттал маз, аьдат- эбадатру ядаву ва дуруччаву мурадрайсса мероприятияртту дуллалаврия. ХIакьину, билаятрай захIматсса тагьар хIасул хьусса ппурттуву, ххишала дакъа тIалавну дур жува цинявппа цачIун буллалисса давуртту. Барчаллагьрай ура ва ххаллилсса байран хIадур дурсса колледжрал каялувчитурайн ва вайннал чIарав бавцIуминнайн, – увкунни ХIайдарбаговлул.
Цала-цала программа ккаккан дунни лакрал, даргиял, къумукьнал, нугъайнал, яруссаннал, лазгиял, агъуллал, табасараннал, рутуллал ва оьруснал миллатирттал.
Лакрал майдан хъун бан бувкIун бия Муъминат Юсупова, ХIусайна ХIусайнаев ва Дагъусттаннал филармониялул артистътал. Фестивальданий яла тяхъамур ва аваданмур майдангу лакрал бия. Фестиваль лахъсса даражалий тIайла дуккан ччянива хIадур хьуну бия колледжраву хьхьичIунну зузисса пишакартал: Фариза Сайпуллаева, Марижат МахIаева, Заира Буттаева, Марианна Жалалова, Асият Мусаева ва Михаил Акаразуев.
Фестивальданул лагрулий хьунни «Дагестанский аул» тIисса этнографиялул музейрал «Традиционный женский костюм народов Дагестана» тIисса цIанилусса суратирттал выставка ва Р. Аьшураьлиевлул цIанийсса Технический колледжрал студентътурал творчествалул (миллатирттал яннардал) презентациярттугу.
Имара Саидова
