Майрал байраннал хьхьичIсса гьантрай цинявппагу субботникрайн бувккун, шагьрулул кIичIиртту, жяматийсса кIанттурду марцI баву ччянира аьдатравун дагьсса акция дур.

Апрельданул 25-нний Дагъусттаннай баян бувсса субботникрай гьуртту хьунни республикалул циняв шагьрурду ва районну.
Къархьунни царагу министерство, жяматийсса организация субботникрай гьурттушинна къадурсса. Бувккун бия волонтерталгу, кIанттул агьалигу, паччахIлугърал властьрал органнал вакилталгу. Щин ялтту ларгун зараллу бивсса кIанттурду лазилакьи бан цачIун шияра тIисса оьвчаву дунни дагъусттанлувтурайн региондалул бакIчи Сергей Меликовлул.

Дагъусттаннал ХIукуматрал ва бакIчинал администрациялул коллективгу бувккунни щалагу Аьрасатнаву баян бувсса субботникрайн. Вайннал марцIшиву дунни МахIачкъалаллал 59-мур школалул лагма-ялттусса, гъараллал зараллу биян бувсса кIанттурдай.
СМИ-лул ва масс-медиалул зузалтрал, миннавух «Илчи» кказитрал зузалтралгу, марцI бунни кказит-журналлал комплексрал чIаравсса «Времена года» сквер. Строительствалул министерство ва мунил биялдарайсса идарарттал коллективру зий бия Редукторный поселокрайсса Столичная кIичIираву. Цала чIарахсса кIанттурду марцI бунни Предпринимательствалул ва инвестициярдал агентствалул зузалтрал.Туризмалул министерствалул зузалтрал лазилакьи бунни гъараллал зия бувсса 3-мур Аварская тIисса кIичIиравалу. Юстициялул министерствалул коллектив зий бия кIива кIанай: Редукторный поселокрайсса Аграрная тIисса кIичIираву ва министерствалул къатрал лагма-ялттусса кIанттурдай. Транспортрал ва ххуллул хозяйствалул министерствалул коллективрал кумаг бунни Пальмира микрорайондалул агьалинан щин ялтту ларгун гьагълил ва ччюрклил дурцIусса хIаятру лазилакьи дан. Гъараллу ларчIсса чIумал шикку 1,5 м гьаз хьуну дуссия щин. ЗахIматрал ва социал лябуккулул министерствалул зузалтрангу бигьа дакъасса даву дуллан багьунни. Пальмира микрорайондалий вайннал гьагълицIа ва гъарал ласун дурсса аьрщарацIа марцI бунни бахьттагьалт заназисса кIанттурду. Госжилинспекциялул зузалтрал марцI бунни Солнечная тIисса кIичIиравалу. Цифрардал министерствалул коллектив зий бия Времена года, Туристическая ва Путешественников тIисса кIичIирттаву. Жагьилтурал министерство, ванил биялдарайсса идарарттал зузалт ва «Цалчинминнал Суккушинна» бувккунни 7-8 Фригатная ва Штормовая тIисса кIичIирттаву марцIшиву дан.

ЦIуллу-сагъшиву дуруччаврил министерствалул коллектив ва 130-нния ливчусса медициналул организациярттал вакилталгу бувккунни субботникрайн. Вайннал ччюрклицIа марцI дурну, лазилакьи дунни азарханардал хIаятру ва лагмасса кIанттурду. Бувгьунни кIиазарунния ливчусса мурхьру, къатIри ва тIутIив. КIяла дунни бордюрду, мурхьирдал ттарцIру. Му бакъассагу, медициналул зузалтрал ва волонтертурал кумаг бунни Дагъусттаннал агьалинан щин ялтту ларгун зараллу хьусса къатри лазилакьи дан. КIулшивуртту дулаврил ва элмулул министерствалул вакилтал зий бия кIива-шанма кIанттурдай. Вайннал марцIшиву дунни Звездопадная тIисса кIичIираву, мукунна министерствалул лагма-ялттусса кIанттурдай.
Щиналу ливчIсса Дагъусттаннал халкьуннан кумаг бан Аьрасатнава увкIсса, миллионнайн бивсса аудитория бусса цIа дурксса блогер Алексейл марцI бунни чIярусса шиннардий салкьи хьусса ччюрклицIа Хасавюрт шагьрулул ца кIичIиравалу. Инсантал щябикIансса скамейкагу бивхьуну, мурхьругу бувгьунни.
МарцIшиврул марафон лавайсса даражалий хьунни.

Андриана Аьбдуллаева